Anene Booysen
Anene Booysen, die 17-jarige meisie van Bredasdorp wat verlede jaar dood is nadat sy op ʼn konstruksiewerf in Bredasdorp verkrag en wreed vermink is, se pleegma is oorlede, berig eNCA.
Volgens die berig is Corlia Olivier in ‘n hospitaal in Bredasdorp aan servikale kanker oorlede. Sy is in Desember daarmee gediagnoseer.
Maroela Media het vroeër die maand berig oor die afsterwe van Anene se biologiese pa, Klaasie Speelman. Sy liggaam is met veelvoudige steekwonde op ʼn ashoop aangetref. Speelman se beweerde moordenaar is in hegtenis geneem.
Anene se moordenaar, Johannes Kana, is verlede jaar in November tot twee keer lewenslank gevonnis nadat hy skuldig bevind is aan haar verkragting en moord.
