Baba Eden: ‘Ouers kom nog tot verhaal’

Eden Laird (Foto: Pink Ladies)

Baba Eden Laird is veilig terug in die sorg van sy duidelik verligte ouers nadat die ouerpaar verlede week deur ʼn warrelwind van emosies gegaan het toe hul babaseuntjie ontvoer en ʼn losprys van R6 miljoen vir sy vrylating geëis is.

Michael Basch, die familie se woordvoerder, het Maandag aan Maroela Media gesê Eden se ouers, Bronwyn en Stuart Laird van Brackendowns in Alberton aan die Oos-Rand, is verheug en dankbaar dat hy terug in hul sorg is.

“ʼn Dokter het Eden ondersoek en bevind hy is heeltemal gesond en ongedeerd,” het Basch gesê.

Maroela Media het vroeër berig Eden is Saterdag net ná middernag gevind en vyf verdagtes, insluitend ʼn huishulp, is in hegtenis geneem. Die kontant wat as deel van die R6 miljoen-losprys betaal is, is ook teruggekry.

Kol. Lungelo Dlamini, woordvoerder van die polisie, het gesê ʼn deeglike ondersoek deur ʼn taakspan van die Suid-Afrikaanse Polisiediens in Gauteng het tot die inhegtenisneming van die vyf verdagtes gelei.

Eden is Woensdag as vermis aangemeld nadat sy huishulp met hom gaan stap het, maar nooit teruggekeer het nie.

“Die polisie het dadelik begin ondersoek instel en verskeie telefoonoproepe, waar die verdagtes R6 miljoen as losprys van die ouers geëis het, gemonitor,” het Dlamini bevestig. “Met behulp van inligting van die gyselaar-onderhandelaar is twee verdagtes by die aflaaipunt in Ekurhuleni-Wes aangekeer. Verdere ondersoeke het die polisie na plakkershut in die Windmill Park- informele nedersetting gelei waar die huishulp en ʼn vermeende samesweerder in hegtenis geneem is. Die vyfde verdagte is in Katlehong aangekeer waar die polisie ook beslag gelê het op ʼn voertuig wat vermoedelik tydens die misdaad gebruik is.”

Basch het versoek dat daar tans nie meer inligting oor die operasionele besonderhede van die reddingspoging bekendgemaak word nie aangesien dit die voortgesette ondersoek kan belemmer.

“Al troos en hoop wat ons tydens die drie dae lange nagmerrie gehad het, was dat ons gevoel het Eden in goeie sorg is. Die huiswerker werk al langer as twee jaar vir die gesin en daar was ʼn band tussen haar en Eden. Alhoewel ons aanvanklik gedink het dit was ʼn ontvoeringsaak, was ons steeds nie bewus of die huiswerker ook dalk ontvoer kon wees nie.”

Basch het gesê die ondersteuning wat die gesin van die begin af van die polisie en die publiek ontvang het, was oorweldigend tydens die moeilike tyd.

“ʼn Mens ervaar ʼn warrelwind van emosies. ʼn Mens moet deur so baie prosesse gaan en dan is daar hoop en dan kan ʼn mens niks anders doen as net sit en wag nie. Alle inligting wat tot jou beskikking is, moet ook baie versigtig uit verskeie oorde gekontroleer word, want ʼn mens weet nooit wie is almal betrokke totdat die ondersoek ontvou nie,” het Basch verduidelik.

“Wanneer dit by ʼn vermiste kind of persoon kom, dan wil ʼn mens so veel inligting as moontlik deel en versprei met die hoop om die persoon op te spoor, maar met ʼn ontvoeringsaak moet ʼn mens die inligting kontroleer, want jy weet nooit wie al die inligting, planne en vordering in die media of sosiale media dophou nie.”

Basch het gesê dit gaan goed met Eden se ouers en het gesê die gesin het gevra vir tyd en ruimte om te genees.

“Dit is vir hulle nog moeilik om tot verhaal te kom met wat gebeur het. Niemand kan vir so ʼn situasie voorberei nie.”

Die egpaar het vier kinders waarvan Eden die jongste is.

Die egpaar het die polisie en alle rolspelers, insluitend die Pink Ladies, bedank vir hul werk wat tot Eden se reddingpoging gelei het.

“Hul onophoudelike toewyding en professionaliteit regdeur hierdie hele proses kan nie onderskat word nie. Ten slotte wil die gesin die duisende mense, plaaslik en van reg oor die wêreld, bedank vir hul boodskappe van ondersteuning en bemoediging.”

Intussen verskyn die vyf verdagtes wat in verband met Eden se ontvoering in hegtenis geneem is, na verwagting vandag in die Alberton-landdroshof verskyn.

Lt.genl. Deliwe de Lange, provinsiale polisiekommissaris, het opdrag gegee dat die polisie se eenheid teen gesinsgeweld, kindermishandeling en seksuele misdrywe verder moet ondersoek instel om ʼn suksesvolle vervolging in die hof te verseker.

Van die vyf verdagtes is vier van Zimbabwe afkomstig en die vyfde verdagte is ʼn Suid-Afrikaner. “Dis belangrik om die nasionaliteit van die verdagtes in dié geval bekend te maak, om lede van die publiek te waarsku teen die roekelose aanstelling van persone sonder om behoorlik hul agtergrond na te gaan,” het De Lange bygevoeg.

Hy het die taakspan geloof wie se doelgerigtheid en toewyding daartoe gelei het dat die vermiste babaseuntjie met sy ouers herenig is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Alida

Knap gedaan SAPD en ALMAL betrokke. Dit is werklik wonderlike werk wat julle verrig het. My hart borrel vir die ouers en die ander kinders. BAIE BLY vir julle. Die Zimbabwiers behoort onmiddellik teruggestuur te word of baie lang tronkstraf opgelê word. Borg sou in hierdie geval totaal en al onvanpas wees want hulle het AMPER hul doel bereik en dit hou ‘n gevaar in vir ander kindertjies.

Nettie

Ons witmense moet leer om eerder maar ons eie werk te doen – huiswerk en tuinwerk, en waar moontlik, ons eie kinders op te pas. Ek weet dit is nie altyd moontlik nie, trouens – min mense kan regtig bekostig dat ‘n Ma of Pa tuisbly om die huiswerk te doen en kinders/babas op te pas vandag. Maar ………. gegewe die feit dat ons nou wéét dat ons die minderheidsras is en daar ‘n volksmoord aan die gang is op blanke mense van regoor die land, maak nie saak waar jy bly, wat jou opvoeding, werk, agtergrond, inkomste ens. is… Lees meer »

Borg?

Borg? Hopelik NIE !!

Linda

Mens kan net die Taakspan van die Polisie, Pink Ladies, Publiek en alle betrokkenes hartlik bedank dat hierdie klein seuntjie lewe.

jaco

waarom nou die ma en pa se name en woonbuurt plaas? dis 1-2-3 en iemand met kriminele neigings gebruik dit om hulle kontakbesonderhede te kry (glo my, dis regtig maklik) en gaan treiter hulle weer.