Baba met Covid-19 veg vir haar lewe

Baba Milané is al ‘n week lank in die hospitaal met Covid-19 (Foto: Verskaf)

ʼn Paartjie van Middelburg, Mpumalanga, sukkel om moed te hou, nadat hul vyf week oue babadogtertjie positief vir Covid-19 getoets het. Sy veg tans om haar lewe in die hospitaal. Dokters het Maandag reeds Milané Grobler se ouers op die ergste voorberei en gesê sy kan moontlik nie die volgende 24 uur oorleef nie.

Dokters sukkel boonop om die regte behandeling op Milané toe te pas, omdat daar nog nie genoeg inligting oor die behandeling van Covid-19 onder sulke jong babas is nie.

Milané se ouers Adela Malan en Christo Grobler, sê vriende, familie en selfs wildvreemdelinge bid onverpoos vir Milané se genesing. “Ons hou meer as ooit vas aan ons geloof.”

Milané het verlede Maandag positief vir Covid-19 getoets.

“Ons het die Saterdagaand agtergekom daar is iets fout met Milané. Sy het langer geslaap as haar normale drie ure roetine. Ons het eers gedink dit is omdat sy bietjie ouer word en in ʼn nuwe roetine ingaan. Ons het Sondagoggend begin bekommerd raak toe sy nie soos normaal haar doek vuilmaak nie en haar na die Dischem in die Middelburg-winkelsentrum se kliniek geneem sodat die suster haar kan ondersoek,” vertel Malan.

“Toe ons in die Dischem instap, was my dogtertjie se gesiggie potblou. Ons het ER24 ontbied en Milané is na die Life Midmed-hospitaal in die dorp geneem. Daar het hulle haar vir Covid-19 getoets en ook ander bloedtoetse gedoen. Sy het positief vir die virus getoets.

“Die hospitaal en sy intensiewe sorgeenheid (ICU) was vol, maar die hospitaal het die moeite gedoen om vir ons ʼn spesiale kamer vir Milané beskikbaar te stel.”

Milané is nou al vir meer as ʼn week lank in die hospitaal en volgens Malan gaan dit party dae beter as ander. Haar toestand het gister (Maandag) egter weer verswak.

“Milané se gesig het weer blou geword en sy wou glad nie melk drink nie. Die susters het haar suurstof vermeerder. Haar suurstofvlakke was heeltyd in die 70% en 80% en het glad nie die 90%-merk bereik nie.”

Volgens Malan was Milané se hartklop teen Maandagmiddag net bo 40 slae per minuut. Haar suurstofvlakke het ook laag gebly.

“Die susters moes weereens haar suurstofvlakke vermeerder. Die dokters het vir haar medikasie en asmapompie gegee om haar longe oop te maak. Die dokter het ook X-strale geneem en gesien die virus het in Milané se bloedselle versprei.”

Hospitale vol

Adela Malan, Christo Grobler en baba Milané Grobler (Foto: Verskaf)

Malan sê die dokter het ander hospitale gebel om vir Milané plek te kry in ʼn pediatriese ICU omdat die Midmed-hospitaal nie oor só ʼn eenheid beskik nie en omdat hul gewone ICU’s vol is.

“Nie een van die hospitale wat gekontak is, het plek gehad of het ʼn pediater beskikbaar gehad nie.

“Die dokter het gevra dat daar vir Milané in Midmed se ICU plek gemaak moet word om haar aan die lewe te hou. Daar het gistermiddag plek vir haar oopgegaan en sy is eindelik in die ICU opgeneem.

Malan sê die dokter doen als in sy vermoë om die regte behandeling toe te pas. Hy het egter gister vir hulle gesê om vir die ergste gereed te maak. “Sy kan dalk oor 24 uur nie meer leef nie. Ons het van gisteraand af mense van wyd en syd gekry wat deur die aand vir Milané gebid het.”

Volgens Malan was Milané sedert geboorte ʼn baie gesonde baba. Sy sê dit was ʼn skok dat Covid-19 haar so erg platgetrek het, omdat die virus nie algemeen onder babas van so ʼn jong ouderdom is nie.

“Ons staan in gebed en geloof, want dié is in God se hande en nie ons s’n nie. Emosioneel weet ’n mens nie hoe om dit te hanteer nie. Ons kry oomblikke wat dinge teveel raak en ons moed wil verloor, maar dan hou God se krag ons aan die gang.”