Baba ook dood in kop-aan-kop-botsing

Drie passasiers van die blou Volkswagen het in die ongeluk omgekom (Foto: Verskaf)

Drie mense, onder wie ʼn maand oue baba, is Maandag dood toe twee motors op die R39-pad naby Lothair in Mpumalanga in ʼn trompop botsing betrokke was.

Volgens brig. Selvy Mohlala, polisiewoordvoerder, het ʼn blou Volkswagen Polo TSI van Ermelo in die rigting van Lothair gereis toe dit reg van voor teen ʼn Audi A3-sedan gebots het. Die Audi het in die teenoorgestelde rigting – in die rigting van Ermelo – gery.

“Volgens berigte is die drie passasiers van die Polo, onder wie ʼn maand oue babadogtertjie, ʼn 13-jarige seun en ʼn 27-jarige vrou, op die toneel dood verklaar,” sê Mohlala. “Die bestuurder en nog twee passasiers van die Polo het ernstige beserings opgedoen.

“Die twee passasiers van die Audi het ook ernstige beserings opgedoen.”

Al die beseerdes is per ambulans na ʼn nabygeleë hospitaal geneem vir verdere mediese behandeling.

Die polisie in Lothair ondersoek ʼn saak van manslag. Die oorsaak van die ongeluk is in hierdie stadium nog nie bekend nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

14 Kommentare

jongste oudste gewildste
Swerwer

Altyd wonderlik dat die oorsaak van die ongeluk onbekend is.

Rudi

RIP die oorledenes. Roekelose bestuur van ons mense. Ek sien dit daagliks.

JM

Darem net te veel kop-aan-kop-botsings die laaste tyd.

Samuel

Tragies, dis nie swak bestuurs werk nie. Dis die regering se skuld. Die paaie in daai nomgewing is so vol slaggate dis n wonder daar sterf nie meer mense daar nie. Kan ons gewone belasting betalers n eis vir vergoeding teen die regering instel.

Roek

Jammer oor die verlies, mense is werklik baie onbedagsaam op die pad ! Ai dit is erg om so ‘n toneel op te ruim en om die verminktes te help uithaal, sterkte ook aan die mense wat werklik hul werk doen vir julle bid ek ook want ek het nog nooit herstel van al die trauma wat ek beleef het toe ek nog op die pad was nie !!