Baba sterf wat in hospitaalverwarmer brand

Madoda Sambatha, LUR vir gesondheid in Noordwes. (Foto: ANA)

Madoda Sambatha, LUR vir gesondheid in Noordwes, sê koppe moet rol nadat ʼn pasgebore baba ernstige brandwonde opgedoen het toe die kind in ʼn babaverwarmer in die Mahikeng Provinsiale Hospitaal geplaas is.

Nadat Sambatha van die skokvoorval te hore gekom het, het hy gereël dat die baba en die baba se ma na ʼn spesialisfasiliteit by ʼn private hospitaal in Pretoria oorgeplaas word. Die baba het egter op pad na die hospitaal gesterf.

“Dit is onverskoonbaar dat ons mense onderwerp word aan hierdie tipe behandeling. Ons word vertrou met die lewens van mense en dikwels die weerloosste mense in ons samelewing,” het Sambatha vandeesweek tydens sy besoek aan die hospitaal gesê.

“Dit is skokkend dat van ons mediese praktisyns by die Mahikeng Provinsiale Hospitaal so min omgee vir mense se lewens. Sulke mense moet die gevolge dra van hul nalatigheid teenoor hul pligte en pasiënte. Ek is vasbeslote om  dienslewering by die hospitaal te herstel en enigiemand wat nie voldoen aan die standaarde van dienslewering nie, moet gereed wees om ernstige gevolge te dra.”

Sambatha het ook ʼn klagte ontvang van ʼn pasiënt wat sleg behandel is deur die verpleegpersoneel by die hospitaal. Nadat die hospitaal oor die klagte ingelig is, het die verpleegpersoneel die pasiënt as “die LUR se pasiënt” geëtiketteer, eerder as om behoorlike mediese sorg aan die pasiënt te gee.

“Die LUR het tot sy skok uitgevind die hospitaalbestuur het ook geen stappe teen die betrokke verpleegsters gedoen nie, ondanks die feit dat die klagte wel by die bestuur aangemeld is,” het woordvoerder Tebogo Lekgethwane gesê.

“In nog ʼn skokkende voorval by dieselfde hospitaal, het ʼn administrasieklerk na bewering vir pasiënte gesê hulle moet huis toe gaan sonder dat hulle ʼn dokter of selfs net ʼn verpleegster gesien het. Met hierdie voorval is daar ook geen stappe teen die administrasieklerk gedoen nie. Hieroor het die LUR opdrag gegee dat daar nou stappe teen die bestuurders gedoen word wat versuim het om die klerk te dissiplineer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Sarel

Bla bla bla te min te laat a.g.v onbevoegde personeel. NGV ?????

Rooi

Hierdie tipe van dinge gebeur daagliks by openbare hospitale. Ek maak gelukkig nie gebruik van openbare hospitale nie maar het dit met my eie oë gesien en ore gehoor hoe mense behandel word. En die ergste van als, die personeel kom niks oor nie. Al word daar klagtes gemaak teen die betrokke personeel.

John

… koppe moet rol… watter tjol. Diè soort mense gaan die nuwe gesondheidsplan hardloop. Mag die Vader ons behoed!

Kallimaari

Tyd om rug te draai op Suid Afrika, die verlore land. Maar waarheen?

Ek wil uit wees voor NHI.

Hanna Hoekom

Maar die regering wil ons totale mediese sorg oorvat…