Beampte by verlate polisiestasie oorrompel, beroof

(Argieffoto: SA Polisie/Facebook)

Die vakbond Popcru het uitgevaar na nóg ʼn aanval op ʼn polisiestasie, dié keer die Tsineng-polisiekantoor in die Noord-Kaap. Die polisiestasie is in die omgewing van Hotazel.

In die jongste voorval het drie mans Saterdagaand omstreeks 21:40 glo die polisiestasie binnegekom, oor ʼn toonbank gespring en die enkele polisiebeampte in die stasie met ʼn vuurwapen gedreig. Hulle het geëis dat sy alle beskikbare vuurwapens en die sleutel vir die kluis oorhandig.

Volgens Popcru het die verdagtes drie R5-gewere en twee magasyne, ammunisie, twee haelgewere met ammunisie, agt 9 mm-pistole, vyf magasyne en ammunisie gebuit.

“Die vrouebeampte is daarna met kabelbinders vasgebind en haar selfoon gesteel,” sê Richard Mamabolo, woordvoerder van Popcru.

“Die onverskrokke aanval gebeur op ʼn tydstip wat baie misdadigers bewus is van die talle onderliggende probleme by vele van ons polisiestasies in landelike en township-gebiede. Dit sluit in te min beamptes en tekorte aan voldoende hulpbronne om die gemeenskap te dien,” sê hy.

Mamabolo sê dit lei boonop tot ʼn gespanne verhouding tussen die polisie en inwoners.

“Tydens die aanval was net twee polisiebeamptes aan diens: Een het uitgegaan op patrollie, terwyl die ander een die stasie beman het.

“Dit is veral kommerwekkend dat ʼn gebied met 23 000 inwoners en 43 nedersettings net twee polisiebeamptes het om dienste aan inwoners te verskaf. Dit plaas nie net die beamptes se lewe op die spel nie, maar versterk ook die wanopvatting dat ons manne en vroue in blou doelbewus versuim om die misdaadsituasie in hul streke te pak,” sê Mamabolo.

“Dit terwyl die onvermoë in werklikheid toegeskryf kan word aan die ongelyke toewysing van hulpbronne.”

Popcru sê dit is ʼn situasie wat dringend aandag verg en landelike en township-polisiestasies moet genoeg hulpbronne ontvang sodat beamptes hul werk kan doen. Die vakbond sê onlangse begrotingsbesnoeiings bemoeilik die situasie verder.

Volgens kol. Brenda Muridili, nasionale polisiewoordvoerder, is altesame 15 wapens gebuit en het die Valke intussen die ondersoek oorgeneem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
Dries

Skokkend !

SjN

Gaan roep vir Hoedeman waar hul besig is om die strande te patroleer sodat hy aandag aan die sake van belang kan gee.

Adriaan

Die Polisie “Diens” het 200 generaals en 600 brigadiere. Die “Diens” dra so swaar aan die top struktuur dat daar byna niks oor is om nog konstabels en sersante ook te wil hê nie.

Anton

Lol, Jan van Riebeeck maak alweer moleste :-)

Kokerboom

Absolute skreiende skande! Die SAPD is tot in sy kern verrot, onbevoeg en pateties. Dank die Kommissaris van Polisie en bevelvoerders af. Dis seker die makliksste manier om wapens GRATIS in die hande te kry en dan wil hul die publiek ontwapen!!! Van om naar te word! Die SAPD en nie boewe blyk nou grootste vyand te wees!