Beddens buite staatshospitaal ‘onveilig vir pasiënte’

Die hospitaalbeddens lê glo en verweer buite die Chris Hani-Baragwanath-hospitaal in Diepkloof.

Die honderde ongebruikte hospitaalbeddens wat buite die Chris Hani Baragwanath-hospitaal in Diepkloof staan, gaan weggegooi word nadat die bestuur van die hospitaal besluit het om dié beddens te vervang in die hospitaal se mediese, chirurgiese en kraamafdelings.

Maroela Media het vroeër berig dat ʼn verbyganger ʼn video van die beddens geneem het waar dit op die hope buite lê en verweer.

Lesemang Matuka, woordvoerder van die departement, het gesê die hospitaal gaan nie meer gebruik maak van dié staalbeddens nie aangesien pasiënte hulself aanhoudend teen die beddens se staalstruktuur stamp. Talle pasiënte het ook van die beddens afgeval waarna die besluit geneem is om dit te vervang met die soort waarvan die hoogte verstel kan word om beserings te verhoed.

Dié besluit is reeds gedurende die finansiële jaar 2016-’17 geneem met inagneming van die hospitaal se pasiënte, het Matuka aan Health-e verduidelik.

Dít kom nadat Jack Bloom, die DA se woordvoerder van gesondheid in Gauteng, sy kommer oor die video uitgespreek het aangesien talle beddens nog in ʼn goeie toestand is.

“[In] onbeskermde toestande gaan dit vinnig agteruitgaan. Dit is ʼn duidelike vermorsing van staatsbates en die beddens behoort beter aangewend te word, eerder as om buite te roes. Daar is ander hospitale wat dringend beddens benodig waar dit gebruik kan word,” het Bloom vroeër gesê.

Die verbyganger het gesê hy skat daar staan nagenoeg 3 000 beddens buite die hospitaal rond.

Prof. Mkhululi Lukhele, hoof van die Gautengse departement van gesondheid, het egter gesê die beddens kan nie onder ander hospitale versprei word nie aangesien dit nie veilig vir pasiënte is nie.

Voorvalle van waar pasiënte val, het “aansienlik” afgeneem sedert die staalbeddens vervang is en nog meer beddens word benodig, het Matuka gesê.

“[Prof. Lukhele] het vertroue in die bevoegdheid van die bestuur van die Baragwanath-hospitaal … Die proses van die wegdoen van die staalbeddens het begin en is aan die gang.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Adrian

Pasiente kan nie afval nie want hul le oppie vloer

Trots Afrikaans

Sjoe, ou bed is seker beter as geen bed nie…….

Gee die beddens vir ‘n privaat instansie om te herstel en dan te verkoop.

Heksie

As dit dan nou so onveilig is vir pasiënte, hoekom dit nie gebruik iewers anders nie? Gee dit vir arm mense, gebruik dit by klinieke,
Nou staan dit en oproes in die wind en weer!!!
Mens kan sien julle het nie daarvoor betaal nie!

Bokkie

Stem saam met Heksie……. Ek is seker daar is meer plekke in hospitale wat onveilig is. Kyk hoe lyk die toilets van sekere hospitale. Party toilette waterbakke het nie deksels nie. Toilette het nie sitplekke op nie. Die reuke wat daarmee gaan is iets verskrikliks, want toilette is nie in werkende toestande nie.

Bokkie

Aitsa >>>>>>>dankie Foxie ek stem saam