Argieffoto
Sibanye-Stillwater het Vrydag gesê ondergrondse bedrywighede het by sy Thembelani-skag in Rustenburg hervat ná die skag veilig gesertifiseer is vir normale hysbedrywighede.
Spoorstawe wat Dinsdag ondergrond vervoer is, het losgekom en in die skag afgeval. Ongeveer 1 800 dagskofwerknemers moes ondergrond op die 14de vlak wag terwyl ʼn inspeksie gedoen is. Hulle is later die aand veilig na die oppervlak gebring.
Neal Froneman, uitvoerende hoof van Sibanye, het Vrydag gesê herstelwerk aan die skag, verwydering van die spoorstawe en ʼn onafhanklike assessering van die skag is veilig afgehandel. “Ons sal nou bepaal hoe die spoorstawe losgekom het. Veiligheid bly ons eerste prioriteit en alle veiligheidsprosedures is gevolg om seker te maak dat nie een van ons werknemers te enige tyd in gevaar was nie.”
