Bejaarde brand erg toe hy vuur aansteek

ʼn Man in sy 70’s het ernstige brandwonde opgedoen toe hy ʼn vuur probeer aansteek het.

Chitra Bodasing, woordvoerder van ER24, het gesê paramedici is Saterdagaand na ʼn huis in Alexandra ontbied, maar die man was reeds na ʼn hospitaal geneem toe hulle daar aankom.

Volgens Bodasing is paramedici na die hospitaal in Edenvale waar die man pas aangekom het. “Paramedici het die man in die ongevalle-eenheid in dokters se teenwoordigheid ondersoek en bevind hy het brandwonde oor verskeie dele van sy lyf opgedoen, insluitend sy gesig en nek.”

Bodasing het gesê paramedici het behandeling toegepas voordat die man in die hospitaal opgeneem is. “Volgens familielede het die man probeer om ʼn vuur met vlambare vloeistof aan te steek toe dit ontplof en hy gebrand het.”