Bejaarde deur kombuisvenster doodgeskiet

Argieffoto: Lorraine Claasen

ʼn Bejaarde man is deur die kombuisvenster van sy huis op ʼn hoewe in Springs aan die Oos-Rand doodgeskiet waarna sy vrou vir ure in die veld weggekruip het.

Die voorval het op die Welgedacht-hoewes plaasgevind waar die 82-jarige man en sy vrou, in haar 70’s, alleen in ʼn huis gebly het.

Volgens Pieter Koen, ʼn buurman van die egpaar, het ander mense wat ook op die hoewes woon omstreeks 19:30 skote gehoor maar kon hulle nie vasstel waar dit vandaan kom nie.

Koen is egter omstreeks 03:30 deur sy honde wakker geblaf toe sy bejaarde buurvrou by sy huis aangekom het nadat sy vir ure in die veld weggekruip het.

Die slagoffer en sy vrou was in die kombuis waar die vrou besig was om kos te maak toe die man twee keer deur die venster in sy bors geskiet is en op die grond geval het. Hy is op die toneel dood.

“Die tannie het eers gedink dit is haar man se vuurwapen wat aan sy sy was wat afgegaan het maar toe druk een van die verdagtes sy hand deur die gebreekte venster en maak die venster oop. Die tannie het geskree sy gaan hom met ʼn mes steek waarop hy geantwoord het hy sal haar skiet.”

Die vrou het hierna by die voordeur uitgehardloop en in die veld gaan wegkruip. Die verdagtes het by die kombuisvenster ingeklim en die slagoffer se vuurwapen gesteel. “Niks anders is gesteel nie. Daar was selfone, ʼn skootrekenaar en TV’s wat net so gelos is.”

Koen het intussen op die buurtwagradio hulp ontbied en die tannie in sy huis ingehelp. “Die egpaar se pitbull het by die oom se liggaam gelê toe ons daar aankom. Ons kon glad nie naby kom nie dan het die hond vir ons gegrom. Ons het die hond met ʼn kombers toegegooi en in een van die kamers gaan toesluit sodat ons by die liggaam kon uitkom. Die hond was verskriklik lief vir die oom.”

Die egpaar se een dogter wat in Roodepoort woon, het haar ook na Springs gehaas en haar ma is intussen in haar sorg. Die egpaar se ander twee kinders woon na wat verneem word in Engeland.

Volgens Koen was die egpaar veiligheidsbewus. “Die oom het wanneer dit begin skemer raak seker gemaak als is gesluit en het dan sy vuurwapen aan sy sy gehad.”

Koen het gesê die slagoffer se vrou het twee aanvallers gesien. Sy het nadat sy gedink het dit is veilig oor die plot se heining geklim en hulp by Koen gaan soek.

Kapt. Johannes Ramphora, woordvoerder van die polisie, het die voorval bevestig. ʼn Saak van moord word ondersoek en die polisie het ʼn soektog na die verdagtes van stapel gestuur.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Johan

Bring die doodstraf terug…. Dis al wat sal help

Mel

So jammer oom. God sluimer en slaap nie. Mense op plase en hoewes moet alarmstelsels kry, sodat hul vooraf gewaarsku word. Ek dink daar moet vir elke plot plaas dit verniet ingesit word wragtig. Dalk moet ons maar oorlog hê en klaarkry want dis nou of ons maar net sit en wag v d dood wag v die vlg slagoffer. Vrouens het met slag v bloedrivier agter hul mans gestaan en aangemoedig en gebid. Dink dis tyd.

Lee

Tragies !
Nou wat help dit jy is bewapen ??

Sorika

Ek het nie meer woorde nie, net ‘n stukkende hart. Dit is daagliks in MM van aanvalle op plase of moorde en dit breek my hart. Aan elke boer en hulle families wil ek vandag net sê dankie vir die opofferings wat julle elke dag maak om ons te voorsien van kos, veral met hierdie tipe geweld elke dag wat julle in die gesig staar. So jammer hierdie Oom is so vinnig weg geruk van sy vrou en kinders. My innigste simpatie aan Tannie en die kinders. Ek voel skuldig dat ek nie meer kan doen nie, maar ek bid… Lees meer »

sweis

Die plaasbewoners moet vir hulle n strik stel beer val die met die tande moet voorkeur kry,strikke wat hom aan sy voet ophang ,rapporteer net aan die polisie en oor twee to drie weke waneer hulle die saak kom ondersoek sny hom vry en gee hom vir hulle.