ʼn Bejaarde egpaar is dood toe ’n brand Woensdag in hul huis op ’n kleinhoewe in Muldersdrif in Gauteng uitgebreek het.
Paul Catlett, ʼn lid van die brandbeskermingsvereniging in Muldersdrift, sê brandbestryders en nooddienswerkers is gisteroggend omstreeks 07:00 na die huis op die kleinhoewe ontbied. Met hul aankoms op die toneel, was die huis reeds in vlamme.
Hulle is ingelig dat twee bejaarde persone van in hul 70’s of 80’s in die huis vasgekeer is. Volgens Catlett kon die span weens die digte rook en vlamme nie dadelik die huis binnegaan nie.
Die vereniging het saam met die Magalies-brandweer en -rampbestuurspan die brand probeer blus en die vlamme is eers ná sowat twee en ʼn half uur in bedwang gebring.
“Die dak het tydens die brand ineengestort,” het Catlett gesê.
Nadat die brand geblus is, is paramedici en lede van die polisie in die huis in waar hulle die twee bejaarde slagoffers aangetref het. Albei is op die toneel dood verklaar.
Catlett sê die vrou was glo bedlêend.
“Dit is nog nie duidelik wat die brand veroorsaak het nie.”
Catlett het mense ná die voorval gewaarsku om bedag te wees op hoe vinnig ʼn brand kan uitbreek en het ʼn beroep op die publiek gedoen om die nodige veiligheidsmaatreëls in te stel om voorvalle te help voorkom.
Maroela Media het ’n navraag aan die provinsiale polisie gerig en wag nog op terugvoer.