ʼn Bejaarde man is tans in ʼn kritieke toestand nadat ʼn brand Sondag vroegoggend by ʼn huis in Johannesburg uitgebreek en hy ernstige brandwonde in die voorval opgedoen het.
Shawn Herbst, woordvoerder van Netcare 911, het gesê paramedici is net voor 05:00 na die huis in 3de Laan, Kew, in die stad ontbied.
Met paramedici se aankoms op die toneel was die huis in ligte laaie. “ʼn Bejaarde is inderhaas deur reddingspanne uit die brandende huis gebring,” het Herbst gesê.
Die man is op die toneel vir ernstige brandwonde behandel voordat hy na ʼn hospitaal gehaas is.
Die oorsaak van die brand is in die stadium onbekend.