Bejaarde radeloos ná aanval op kleinhoewe

Wessel Kriek kort ná die aanval in September vanjaar. Foto: Verskaf

“Ek is nou moeg vir die hospitaal. Ek gaan nou maar hier by die huis sit en doodgaan.”

Só sê Wessel Kriek (73) van sy gesondheidsprobleme ná die aanval op 8 September op hom en sy vrou, Valerie (72), op hul kleinhoewe by Daniëlskuil in die Noord-Kaap waarin hulle van R200 000 beroof is. Die aanvallers het in hul Mercedes-Benz weggekom, maar dis later verlate op die buurdorp Kuruman gekry.

“Ek het ʼn hartaanval gehad en beroerte gekry en het 17 dae in die hospitaal gelê,” het Kriek Dinsdag aan Maroela Media gesê. “Toe swel my bene op. Die dokters was bang vir bloedklonte, maar ek sien nie kans om terug te gaan hospitaal toe nie.

Toe ek die hek oopmaak, het hulle my platgeduik in die winkeltjie.

“Ek het nou emfiseem. Ek weet nie of dit is van hoe [die aanvallers] op my bors getrap het nie.”

Kriek en sy vrou is die Saterdag omstreeks 18:00 op hul kleinhoewe oorval. “Twee [jong mans] het eers gevra ek moet die hek vir hulle oopmaak,” vertel hy. “Toe ek die hek oopmaak, het hulle my platgeduik in die winkeltjie hier op ons kleinhoewe.”

Nadat sy vrou uit die huis gekom het om te kom kyk wat aangaan, het hulle haar en haar man in die huis ingedra en in hul kamer met elektriese kabels vasgemaak. “Hulle het alles voor ons oë uit die kaste gestroop en ons kon niks maak nie,” onthou Kriek.

Hy is ongelukkig omdat niemand hom en sy vrou laat weet het toe die drie verdagtes wat aangekeer is met ʼn rewolwer in hul besit op Kuruman in die landdroshof voorgekom het nie. Kriek sê die saak is uitgegooi omdat die landdros gemeen het daar is onvoldoende bewyse teen die verdagtes.

Hy sê egter drie speurders het hom en sy vrou Vrydag besoek om blykbaar die saak opnuut te ondersoek.

Waarnatoe kan ons gaan?

Intussen probeer hy en sy vrou so normaal moontlik hul lewe hervat, maar maklik is dit nie. “Ek voel in ʼn sekere mate onrustig. Ons sluit nou maar saans alles toe en bly maar in die huis.”

Hy vertel hul kinders wil hê hulle moet trek. “Maar waarnatoe moet ek padgee? Waarnatoe kan ons gaan? ʼn Mens is nêrens meer veilig nie.”

Kapt. Sergio Kock, Noord-Kaapse polisiewoordvoerder, het by navraag gesê drie verdagtes is op 28 September in hegtenis geneem. “Hulle het op 1 Oktober in die landdroshof op Postmasburg verskyn. Die saak is voorlopig teruggetrek vir verdere ondersoek.”

Hy vra enigeen met inligting wat die polisie in hul ondersoek kan help, moet ao. Riaan Kock by 082 495 4681 bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
Piet

Kan jy glo saak is uit die hof gegooi hoekom is die 2 mense wat aangerand en beroof is nie laat weet nie sinnelose aanranding op senior burgers die wet het weereens gefaal

AW

“ondersoek hervat is ?”……

Gemaskerde Sopbeen

“Ons sluit nou maar alles toe en bly binne in die huis”….Dis reg my oom…..DIT is die nuwe Suid Afrika wat die vorige regering vir ons “onderhandel” het….en nou loop en spog dat die ANC nie die “stryd gewen het” nie, maar die land op ‘n skinkbord “ontvang” het…..sodat almal se lewens “beter” kan wees. Well, guess what….? Dit het toe nie so uitgewerk nie, het dit? Nou wat nou….?

IK

Dit is seker die mees gewildste sinnetjie wat in enige nuusmedia verskyn naamlik ‘met ons ter perse gaan (ten tyde van publikasie/sperdatum) wag ons nog op ‘n antwoord’. Dit is net hier waar daar tot in ewigheid gewag sal word op ‘n antwoord.

Hoe?

Met watse geld Gerhard? Weet jy hoeveel kapitaal ‘n mens beskikbaar moet hê tydens jou aansoek om goedkeuring te kry om Orania toe te verhuis? Jy moet ‘n belegging vir die dorp wees voor jy aanvaar word, jy moet ekonomies kan bydra en self ‘n kwalifikasie of vaardigehede hê wat tot die bevordering van die dorp sal wees, soos om te kan Boer of Entrepreneurskap aan te gaan. Die Oom en Tannie is van R200 000 beroof. Ek ken die mense maar net van sien – hulle het nie ekstra rondlê geld om enigsins te oorweeg om iewers anders heen… Lees meer »