ʼn Man in sy 70’s is dood en vier mense beseer toe twee voertuie Maandagmiddag trompop op die N1-snelweg in die Vrystaat gebots het.
Russel Meiring, woordvoerder van ER24, het gesê die ongeluk het sowat 40 km buite Bloemfontein plaasgevind.
“Die oorsaak van die ongeluk is nog nie bekend nie en word ondersoek,” het Meiring gesê.
Die oorledene se voertuig het in die veld langs die pad tot stilstand gekom. Sy liggaam is sowat 10 m van die voertuig aangetref. Hy is op die toneel dood verklaar.
“Vier ander pasiënte, onder wie ʼn eenjarige baba, is op die toneel behandel. Hulle het geringe en matige beserings opgedoen.”
Die pasiënte is na die MediClinic Bloemfontein en die Pelonomi-hospitaal geneem vir verdere behandeling.