Bejaarde sterf ná mesaanval in bed

Argieffoto: http://www.jameschesley.com/

Argieffoto: http://www.jameschesley.com/

Die bejaarde man wat Woensdagoggend in ʼn kritieke toestand na ʼn hospitaal geneem is nadat hy in sy bed in sy huis in Krugersdorp aan die Wes-Rand met ʼn mes aangeval is, het aan sy beserings beswyk.

Sers. Tshepiso Mashele, woordvoerder van die Krugersdorp-polisie, het Woensdagmiddag die man se dood aan Maroela Media bevestig. Sy naam kan nog nie bekend gemaak word nie.

“ʼn Saak van poging tot moord is aanvanklik geopen, maar ʼn moordsaak word nou ondersoek,” het sy gesê.

Brig. Patrick Baloyi, stasiebevelvoerder van die Krugersdorp-polisie, het die daad as ʼn sinnelose moord bestempel en gesê speurders is nog op die toneel om dit vir leidrade te fynkam.

Maroela Media het vroeër berig die man, in sy 80’s, is omstreeks 07:30 in ʼn plas bloed in sy bed in sy huis in Beyersstraat in Krugersdorp-Wes aangetref. Hy het verskeie steekwonde opgedoen.

“Inligting oor die motief vir die grusame aanval en hoe laat dit plaasgevind het, is nog skraps en word ondersoek. Die slagoffer kon nie ondervra word nie omdat hy weens sy ernstige beserings na ʼn hospitaal geneem is voordat polisiebeamptes met hom kon praat,” het Mashele gesê. Dit is nog nie duidelik of die man alleen in die huis was tydens die aanval nie.

Paramedici van Netcare 911 het die man op die toneel gestabiliseer voordat hy na ʼn nabygeleë hospitaal geneem is vir verdere behandeling.

Niemand is nog in verband met die moord in hegtenis geneem nie. Die polisie het ʼn beroep op die publiek gedoen om die polisie by 011 951 1151 of Crime Stop by 08600 10111 te bel met enige inligting wat die polisie in sy ondersoek kan bystaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Alta

Liewe hemel wie is so wreed om n bejaarde dood te steek

Tollies

Ai Hy verdien dit nie, ek hoop darm Hy het klein kinders gehad wat sy laaste dae daar was vir Hom
en gelukkig gemaak het

Denise

Ek is baie hartseer om te lees die oom is dood ai ek verstaan nie die lewe meer nie hoekom onskuldige mense so aanrand rus in vrede oom jy het nie verdien om so dood te gan nie!!!!

Paula

Die aktiwiteit in daardie straat lyk my is besig. Ken mense wat Vrydagaand by die huis gekom het na werk en rot en kaal besteel is. Wonder of dit nie dieselfde hande is nie.

Savethetigerplz

So sad! 80 jaar oud. Wanneer gaan al die aanvalle stop, wie sit agter al die moorde ?