Bekommernis oor polisie se ‘heksejag’ na onluste

Inwoners van verskeie woonbuurte en dorpe in KwaZulu-Natal en Gauteng was gedwing om huis en haard tydens die onluste van ‘n maand gelede te beskerm. (Foto: Youtube-skermgreep.) 

Vrystaat Landbou (VL) het sy kommer uitgespreek oor die polisie se “heksejag” op lede van die publiek wat hulself tydens die onrus in KwaZulu-Natal en Gauteng probeer beskerm het.

Volgens Francois Wilken, president van VL, is Bheki Cele, minister van polisie, se onlangse uitsprake in die media kommerwekkend en teleurstellend. Cele het aangekondig dat die polisie se fokus rakende die onrus in KwaZulu-Natal en Gauteng geskuif het na misdadige ondersoeke op die sogenaamde burgery wat hulself in die onrus probeer beskerm het. Die vraag is volgens hom waarom daar nie eerder ondersoek ingestel word waarom die polisie nie sy mandaat soos vervat in die Grondwet en Suid-Afrikaanse Polisiewet (Wet 68 van 1995) kan nakom nie.

Wilken sê dat die vyf kernpilare van die Polisiewet juis aandui dat die polisie verantwoordelik is vir die handhawing van binnelandse stabiliteit, uitvoering van wet en orde, beskerming van burgery en hul eiendom asook die voorkoming van misdaad. “Gegewe die onrus wat in die twee provinsies plaasgevind het, is die onvermoë van die polisie totaal uitgewys.”

Tommie Esterhuyse, adjunkpresident van VL, meld dat die agt pilare van die landelike beveiligingstrategie wat in 2019 hersien is, ʼn sterk fokus op die vermoë van die SAPD plaas ten opsigte van kapasiteit, mannekrag, toerusting en logistieke vermoëns (vuurwapens en ammunisie). Gegewe die status quo voer hy aan dat die polisie ver daarin te kort skiet om die landelike gebiede en boerderygemeenskappe teen verhoogde misdadigheid te beskerm.

“Die onsekerheid en wantroue van die publiek oor hoe die polisie die onrus in KwaZulu-Natal en Gauteng beheer het, het verder onder die algemene publiek en die landelike gebiede toegeneem. Die impak en omvang van die onrus is geweldig groot, nie net in die ekonomie nie, maar ook ten opsigte van die bekostigbaarheid van voedsel vir die gewone burger,” meen Esterhuyse.

Volgens Jakkals le Roux, voorsitter van VL se landelike veiligheidskomitee, wil dit voorkom asof die minister met die ondersoeke die wetsgehoorsame burgers en publiek die vyand wil maak wat geen regte het om hom/haarself te beskerm nie. “Dit lyk of die polisie daardeur besef dat hy nie sy regsverpligting teenoor die algemene publiek nakom nie.”

VL sê hy is verder besorg oor die politieke “inmenging” in die uitvoering van die polisie se operasionele mandaat en verantwoordbaarheid wat tans tussen die minister en die topstruktuur van die SAPD uitspeel.

“Die onrus in KwaZulu-Natal en Gauteng laat weer eens die vraag ontstaan hoe die redelike man homself gaan verdedig en beskerm in onrusverwante situasies, asook in ʼn verhoogde misdadige aanslag, as die polisie se ‘wiele afval’? Dit beteken dat die algemene burgery self aangewese is om na hul eie veiligheid om te sien.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Anoniem

Dit is mos hoe dit die afgelope 20 jaar in ons land gaan. Onskuldige mense word vervolg en die skuldiges/plunderaars loop op straat. Die beste is dat die Regering hul altyd tot die wetgehoorsames wend om finansiële bydraes te maak , kos te voorsien, en die “Regering” by te staan. Wonder wat sal gebeur as ons almal ons rug op hul draai. Die Regering vergeet waar alles van daan kom.

Persheks Adri

SAPS is verantwoordelik vir alles soos genoem in paragraaf 3, maar aanvaar nie verantwoordelikheid vir dit nie! Hoe nou gemaak as hulle ons as misdadigers uitmaak en ons nie onsself mag beskerm nie? Moet ons soos blompotte staan en wag dat ons vermoor word?

Misky

Wonder wat sou gebeur het as die gewone landsburger en gemeenskappe nie saamgestaan het en daai kriminele uit ons woonareas gehou het nie? Dit sou tien teen een op slagting en moord uitgedraai het. Ons minister met die hoed sou omdraai en sê hulle “veroordeel die dade en sal ‘n ondersoek loods”. En dit sou die einde van die saak wees vir hulle

fransdutoit3

Die burgery is sagte teikens om die totale onbevoegdheid van Cele se gewapende bendes te probeer verbloem.

Kobus

Nou is hy (Cele) kaaitjie van die baan. Groot meneer.