Beleggers verloor miljoene met ‘piramideskema’

Willie Breedt het glo gereeld luukse motors, motorfietse en huise aangeskaf. (Foto: Verskaf)

Meer as 2 000 beleggers wat sowat R270 miljoen by VaultAge Solutions (VS) belê het, het die afgelope week benoud rondgeskarrel ná die onderneming se uitvoerende hoof, Willie Breedt, se boedel gesekwestreer is.

Die hofbevel wat in Maroela Media se besit is, wys dat ʼn dringende aansoek om Breedt bankrot te verklaar, deur een van die beleggers, Simon Dix, in die hooggeregshof in Pretoria gebring is. Dix is van Hilton in KwaZulu-Natal en het glo R7,5 miljoen in kripto-geldeenhede deur die VaultAge‑platform belê.

Beleggers sê Breedt het hulle ʼn maandelikse groei van 20% op hul geld beloof, maar teen September verlede jaar het hy opgehou om hulle te betaal. Baie van hulle is pensioenarisse, motorfietsentoesiaste en lede van die SA weermag.

Maroela Media kon intussen bevestig dat die 44-jarige Breedt ʼn vorige veroordeling vir bedrog het waarvoor hy ʼn vonnis van ses jaar ontvang het wat vir vyf jaar opgeskort is. Die opgeskorte vonnis loop glo in September vanjaar ten einde.

Beskikbare foto’s wys dat Breedt glansryk geleef het. Hy het onder meer ʼn versameling luukse motors en motorfietse ter waarde van miljoene rande besit.

In Januarie het hy sy paleisagtige huis in die Featherbrooke-landgoed aan die Wesrand verruil vir een in die Marina Martinique-landgoed in Astonbaai in die Oos-Kaap. Hy het egter haastig spore gemaak na ʼn groep beleggers en skuldinvorderaars by sy huis opgedaag het om hulle geld terug te eis.

Willie Breedt het glo gereeld luukse motors, motorfietse en huise aangeskaf. (Foto: Verskaf)

Volgens Maroela Media se bronne het Breedt ’n saak van intimidasie by die polisie in Jeffreysbaai geopen, waarna hy spoorloos verdwyn het. Die bespiegeling was dat hy na Mosambiek gevlug het. Volgens ʼn private ondersoeker het Breedt en sy vrou se selfoonseine egter aangedui dat hulle in Pretoria was.

Volgens verskeie mediaberigte het die balju, die polisie en ʼn span forensiese ondersoekers van die Valke ná die hofbevel toegestaan is, op ’n huis in Silver Lakes in die ooste van die stad toegeslaan. Hier het Breedt na bewering sedert middel Junie onder ʼn skuilnaam gebly.

Daar is glo op ’n skootrekenaar en nano-stokkie beslag gelê wat moontlik inligting stoor oor waar die kripto-geldeenhede kan wees wat Breedt verhandel het. Hy is nie in hegtenis geneem nie.

Een van Breedt se voormalige vertrouelinge wat anoniem wil bly, het aan Maroela Media gesê daar is beleggers wat soveel as R10 miljoen aan Breedt oorhandig het om kripto’s te koop wat hy onderskeidelik op die Bitfinex‑, Bitrex‑ en Binance-platforms sou verhandel. Die geld is glo in sy Suid‑Afrikaanse bankrekening of direk in sy kriptobeursies inbetaal.

Hy beweer dat van die beleggers glo vroeg in die jaar hul geld wou onttrek, maar Breedt het hulle per e-pos laat weet dat dit agt tot 10 weke sou neem om die geld te ontvang. “Ons probeer om elke navraag en terugvoering so vinnig as moontlik te hanteer. Ek het baie geleer in die afgelope ses maande en vra elke lid om verskoning. Ek wil net sê dat ek sal voortgaan met my toewyding aan elke lid,” lui die e-pos wat Maroela Media onder oë gehad het.

Volgens Breedt se voormalige vertroueling was die bedrae wat uitbetaal sou word, gespesifiseer, maar uiteindelik is geen betalings gemaak nie.

ʼn Sakeman van die Wesrand vertel dat feitlik al die lede van die motorfietsgroep waaraan Breedt behoort het, geld by hom belê het. Hyself het R9 miljoen oorhandig en sy belegging het volgens Breedt se korrespondensie binne twee jaar tot R180 miljoen gegroei.

“Hy is skrikwekkend oneerlik en het openlik vir almal gelieg en die ergste is dat ons hom vir lank geglo het,” sê die man. “My ouers en ander familie en vriende het almal baie geld ingesit en het nou niks nie. Almal se drome is vernietig,” sê hy.

Maroela Media het die sakeman aanvanklik gekontak omdat dokumente in ons besit wys dat hy in Januarie meer as $8 miljoen van VaultAge ontvang het. Hy ontken dit en sê hy vermoed sy rekeninge by VaultAge is in daardie stadium gekonsolideer en daarom lyk dit asof ʼn betaling aan hom gemaak is.

“As ek so ʼn bedrag ontvang het, sou ek nie nou in finansiële moeilikheid gewees het nie,” sê hy.

ʼn Afgetrede egpaar wat R350 000 belê het, sê hulle het van April tot September verlede jaar 5% groei op hul belegging ontvang, terwyl die ander 15% herbelê is. Hulle hoop nou dat Breedt tot verantwoording geroep sal word.

Jayden-Lee Rossouw, ʼn stafsersant in die weermag, het in Mei verlede jaar R70 000 kontant aan VaultAge betaal waarmee Breedt vir haar in Bitcoin moes handel. Haar belegging het maandeliks met 20% gegroei.

Sy het net twee onttrekkings gemaak en die winste herbelê. In Mei vanjaar het Breedt per e-pos laat weet dat haar belegging reeds op meer as R555 000 staan. “Ons is beloftes gemaak wat nie nagekom is nie; ek kan nog werk, maar ek is jammer vir die bejaardes wat hul laaste geld ingesit het en alles verloor het,” het sy per WhatsApp laat weet.

Nog ʼn belegger wat anoniem wil bly, het R2 miljoen belê en sy dogter R400 000. Hy sê mense moet verantwoordelikheid neem vir hul besluite. “Niemand het gekla toe dit goed gegaan het en groot uitbetalings gemaak is nie.”

Hy beweer die lede van die motorfietsgroep het “miljoene geskep” en dat daar steeds baie geld in Breedt se kriptobeursies is.

Gordon Kayser van GTA Kayser Prokureurs het vroeër aan die media gesê Breedt kan moontlik van verskeie oortredings van die wet op finansiële instellings aangekla word. Daar is ook die moontlikheid van ʼn klas‑aksie teen Breedt se bankrot boedel.

ʼn Groep beleggers het reeds onlangs ‘n hofbevel verkry om twee Suid-Afrikaanse bankrekenings van Breedt en VaultAge Solutions te bevries terwyl die Reserwebank ʼn rekenmeestersfirma aangestel het om VaultAge Solutions te ondersoek.

Breedt het nie op navrae reageer nie.