Beperkings op drankverkope ingestel

(Foto: Henk Kruger/ANA)

Slegs plekke soos restaurante, kroeë en sjebeens waar drank op die perseel verbruik word, sal toegelaat word om drank oor die Paasnaweek te verkoop. Drankwinkels sal dus verbied word om drank op Vrydag, Saterdag, Sondag en Maandag te verkoop.

Dit is van die veranderings wat pres. Cyril Ramaphosa Dinsdagaand aan die huidige afsonderingsregulasies aangekondig het. Hy het die land Dinsdagaand toegespreek ná afloop van vergaderings met verskeie belangegroepe in aanloop tot die Paastyd. Die land bly steeds op vlak 1 van afsondering. Ná afloop van verskeie versoeke van geloofsgroepe om byeenkomste oor die Paastyd te hou, het die regering wel besluit om die getal mense wat by openbare byeenkomste toegelaat word, tot 250 mense binnenshuis en 500 mense buite te vermeerder.

Ander regulasies, soos die huidige aandklokreël (van 00:00 tot 04:00) en die maksimum toelaatbare getal begrafnisgangers (100) bly steeds van krag. Strande en parke bly oop en Suid-Afrikaners mag ook steeds tydens die komende langnaweek oor provinsiale grense reis. Hulle word egter aangemoedig om liefs tuis te bly indien dit enigsins moontlik is. Dié regulasies sal weer binne die volgende 15 dae hersien word.

Suid-Afrika is nou reeds net meer as ʼn jaar in ʼn ramptoestand, waartydens verskeie vlakke van inperking geld. In dié tyd is meer as 1,5 miljoen mense met Covid-19 gediagnoseer en 52 000 sterftes aangeteken.

Die eerste Covid-19-inentings vind plaas by die Chris Hani Baragwanath-akademiese hospitaal in Johannesburg. (Foto: Verskaf)

Tans word ʼn gemiddel van 1 200 nuwe gevalle daagliks aangemeld en dié gevalle is vir die afgelope twee weke reeds stabiel. Die getal mense wat sterf of in die hospitaal opgeneem word, toon ook nie ʼn noemenswaardige styging nie. “Daarom het die regering besluit om die land op vlak 1 van inperking te hou. Dit is egter belangrik dat die nodige gesondheidsmaatreëls, soos die dra van maskers en die hou van sosiale afstande deurentyd gevolg word,” het Ramaphosa gesê.

Hy het voorts gesê dat Suid-Afrika se inentingsprogram “op koers” is en dat die eerste fase steeds binne drie maande sedert die aanvang in middel Februarie voltooi sal wees. “Suid-Afrika sal steeds op 1 Mei met fase twee van die inentingsprogram begin, waartydens ouer mense en mense met lewensbedreigende siektes eerste ingeënt sal word.”

Volgens Ramaphosa is 11 miljoen dosisse van die Johnson & Johnson-entstof reeds bekom en die regering is sterk op pad om nog 20 miljoen dosisse aan te skaf. 20 miljoen dosisse van die Pfizer-entstof is ook in die proses om aangekoop te word. “Hierdie dosisse sal genoeg voorraad bied om 41 miljoen van die bevolking in te ent.” Altesaam 2 000 persele, insluitend apteke, dokters se spreekkamers en groter ruimtes soos sportstadions is reeds geïdentifiseer waar entstowwe toegedien kan word.

Die president het gesê die inentingsproses sal deur middel van ʼn digitale stelsel geadministreer word, wat vereis dat lede van die bevolking eers aanlyn registreer voordat hulle ingeënt kan word. Die stelsel sal dan aan die betrokke kandidaat kommunikeer waar en wanneer hy of sy ingeënt sal word. Ná afloop van die inenting sal ʼn inentingsertifikaat uitgereik word.

“Lande kompeteer hard met mekaar om entstowwe in die hande te kry. Ten spyte van verskeie vertragings doen die Suid-Afrikaanse regering alles in sy vermoë om genoeg entstowwe in die hande te kry om te verseker dat soveel as moontlik Suid-Afrikaners in die kortste moontlike tyd ingeënt word,” sê Ramaphosa.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Deon

Tyd dat hulle hierdie “virus” ophou misbruik teen ons as publiek,ons word soos marionette beheer, ek is nou siek en sat daarvan, klomp van hulle regulasies maak nie sin nie, kan dronk word in n restaurant en in die straat af huistoe ry, maar die ou wat rustig sy drankie by sy huis wil geniet mag nie vir hom daarvan aanskaf nie. Viva SA, weg met die ANC….

Nico

Hoe dink Ramaposa, maak die drankwinkels toe, openbare drinkplekke bly oop waar is die social distance, kyk hoeveel mense gaan daar bymekaar kom.

Dirk Mostert

Staan vanoggend op met ‘n gekriewel in my keel en ‘n droe hoes. Dis sweerlik “pas-alle-simptome”-19, variant 501(c)(11). My verdiende loon omdat ek nie die huis gesanitiseer en hande gewas het voor slaaptyd nie, sosiale afstand veronagsaam en bowenal nie met ‘n gesigmasker geslaap het nie. Seker nie weens die muskiet wat ek ingesluk het nie.

piper

dit maak geen sin nie. nou gaan die mense stroom na die drinkpkekkewaar hulle op mekaar sit en drink in plaas van by die huis drink. wat dalk gaan help is padongelukke kan dalk verminder.

Gato

Is CR se rekeningkunde net so swak soos Zuma s’n of het MM verkeerd berig?
11 + 20 + 20 = 41 ?

Geen logika in die reëls nie. 250 mense binneshuis by byeenkomste maar net 100 by begrafnis. Teiken die virus begrafnisgangers by uitstek?