Argieffoto
Die polisie in KwaZulu-Natal het Saterdag bevestig ʼn berugte groep misdadigers, lede van die Msenti-bende, is vandeesweek in hegtenis geneem.
“Vier mans is Donderdag in KwaMushu in hegtenis geneem,” het maj. Thulani Zwane, woordvoerder van die polisie, gesê. “Hulle word gesoek in verband met ʼn aantal huisbrake en sakerooftogte in die Inanda-gebied. Die polisie het beslag gelê op twee ongelisensieerde vuurwapens, ʼn .303-geweer en ʼn 9 mm-pistool.”
Die mans het glo die gemeenskap van Inanda en omgewing geteister. Een van die vuurwapens wat gevind is, is glo by ʼn polisiebeampte afgeneem toe hy vroeër vanjaar by Ntuzuma aangeval en beroof is.
Volgens Zwane sal die mans Dinsdag in die Ntuzuma-landdroshof verskyn.
