Besetters sak toe op grond in Pta-Oos

Foto: Facebook via Ernst Botha.

ʼn Groep mense het glo Sondagmiddag probeer om ʼn munisipale padreserwe in Faerie Glen in Pretoria-Oos te beset.

Ernst Botha, wyksraadslid, het gesê die voorval het in Plastonstraat plaasgevind. Gemeenskapslede het volgens hom by die toneel opgedaag om die mense wat beweer dat hulle die eienaars van die grond is te ontmoet nadat die besetters begin bou en glo ʼn onwettige waterverbinding op die stuk grond aangebring het.

“Dit was waarskynlik om die bouwerk meer eg te laat lyk,” het Botha op Facebook laat hoor.

Botha het die burgemeesterskomiteelid én die voorsitter van paaie en vervoer genader en hulle het aan hom bevestig dat geen munisipale grond aan dié “eienaars” verkoop is nie.

“Ek het die vergadering onderbreek en gesê ons kan nie met skelms wat grond gryp, redeneer nie en indien hulle nie die teendeel kan bewys nie, moet hulle van die grond af padgee. Die grondgrypers, wat in daardie stadium nog baie diplomaties was, het toe hul ware kleure en bedoelings gewys,” het Botha gesê.

Volgens Botha is die gemeenskap gedreig dat hul huise afgebrand en hulle vermoor sal word. “Daar was ʼn paar onderonsies tussen die grondgrypers en die gemeenskap wat lede van die Tshwane-metropolisie (TMPD) en die polisie moes ontlont.”

ʼn Onderhandelaar het daarna glo vir Botha gevra om die gemeenskap sover te kry om in te stem tot ʼn vergadering later vandeesweek anders sou hulle nie die grond verlaat nie.

“Ek het vir hom [die onderhandelaar] gesê as hulle nie loop nie, kan ek nie verantwoordelik gehou word vir enige moontlike optrede van die gemeenskap af nie.”

Luidens Botha is die besetters sowat 15 minute later van die toneel weg, sommige volgens hom in ʼn Mercedes-Benz en ʼn Range Rover, en het hulle geskree dat hulle die grond met mag sal afvat.

Volgens Botha sou die TMPD se grondbetredingseenheid die omgewing skoongemaak het en die polisiëringsforum ook die omgewing patrolleer om die veiligheid van die inwoners te verseker.

Botha het gemeenskapslede gemaan om by hul plaaslike GPF aan te sluit, by ʼn gemeenskap-WhatsApp-groep in te skakel en ʼn persoonlike verhouding met hul plaaslike veiligheidsmaatskappye te bou.

ʼn Plaaslike polisiewoordvoerder het navrae na die TMPD of provinsiale polisie verwys. Sr.supt. Isaac Mahamba, woordvoerder van die TMPD, het onderneem om kommentaar te lewer, maar het ten tyde van publikasie steeds geen inligting verskaf nie.

Kol. Lungelo Dlamini, provinsiale woordvoerder van die polisie, was ook nie onmiddellik beskikbaar vir kommentaar nie. Kommentaar sal sodra dit ontvang word by die berig bygewerk word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Moord en Roof

Nou daar het jy dit nou – dit gaan nie oor enige boerdery nie – dit gaan oor moord en roof en gryp.

Gerhard

Hier kom nog oorlog oor hierdie grond kwessie!
“Watch this Space”

Penellope Jones

Ontbied die ANC en die EFF wat hierdie hele gemors begin het.

marous

Dis net die begin.

Ander Annie

Mooi man , Mercedes Benz en Jeeps. Die grondgrypers is mos spoggerig. Klink mos vir my dit is sommer net moeiliheid soek.