Beskerm Afrikaanse universiteite terwyl nuwe instellings gebou word

FAK-universiteitswese-toekoms

‘n Skermskoot uit die video.

Sprekers by ʼn konferensie oor die toekoms van die Suid-Afrikaanse universiteitswese was dit eens dat private hoër onderwysinstellings so gou en goed as moontlik uitgebou word, terwyl geveg word vir die behoud van Suid-Afrika se openbare universiteite.

Die konferensie is Donderdag deur die FAK se NP van Wyk-Louw-sentrum vir gemeenskapstudies by die Voortrekkermonument in Centurion aangebied.

Prof. Danie Goosen, voorsitter van die FAK, het gesê moderne universiteite het van die staat afhanklik geword en hy het daarom voorspraak gemaak vir ʼn terugkeer na die klassieke model van universiteite wat vanuit die gemeenskap ontstaan het vir gemeenskappe.

Hy het verder gesê die staat wil standaardiseer en vereenvoudig en daarom staan hulle die idee van enkelmedium-universiteite voor. “Dit is dalk nie noodwendig die gevolge van die een of ander bose agent wat in die agtergrond toutjies trek ten gunste van Engels nie, maar dit is ʼn gevolgtrekking van die logika van die staat wat wil vereenvoudig, standaardiseer en funksionaliseer en ons sit vandag met die gevolge hiervan, ook in universiteite.”

“Ons moet die bestaande strukture beskerm met al die instrumente tot ons beskikking, wat die grondwet insluit, maar ons weet dat die werklikheid besig is om onder ons uit te loop en dat ons alternatiewe instellings moet daarstel,” het Goosen gesê.

Prof. Pieter Duvenage, hoof van die departement filosofie aan die Universiteit van die Vrystaat (UV), is ook ʼn voorstander van ʼn tweeledige strategie tot die toekoms van universiteite. “Stry die goeie stryd by die bestaande universiteite, maar bou nuwe universiteite so sterk, goed en gou as moontlik.”

Volgens Duvenage is die hofsake teen die taalbeleide van die voormalige Afrikaanse universiteite van uiterste belang. “Dit gaan na die grein, na die diepste weefsel van wat in 1994 gebeur het, asook die Grondwet van 1996. As hierdie saak teen Afrikaans by die universiteit gaan uitkom, gaan dit ʼn verskriklike sein in die Suid-Afrikaanse samelewing instuur.”

Duvenage glo indien Afrikaans by universiteite afgeskaf word, sal dit ʼn krisis vir die bevordering en uitbou van ander inheemse tale in Suid-Afrika beteken. Hy het ook gewaarsku dat wat tans met Afrikaans by universiteite gebeur, kan oorspoel na Afrikaanse skole.

“Ons sal ʼn strategie moet bedink oor die skole, want die ou model-C skool is die volgende wat in die slag gaan bly as ons hierdie vier sake by die universiteite verloor. Dan sal ons privaatskole moet oprig dat dit klap, want ek gaan nie toelaat dat ʼn staat vir my voorskryf oor hoe ek my moedertaal gebruik nie.”

Willie Spies, prokureur van AfriForum en ʼn lid van die raad van die Universiteit van Pretoria (UP), wat ook ʼn spreker by die konferensie was, meen die boustene vir die onafhanklike universiteite van wêreldgehalte is tot Afrikaners se beskikking en die antwoord vir die Afrikaanse universiteitswese lê in selfstandige instellings wat die vermoë het om hul eie inkomstestrome te beheer.

Hy meen Afrikaners het daarin geslaag om universiteite soos die UP op te rig. “Kom ons begin weer om soos in 1908 te bou, want die boustene is klaar daar. Kyk wat in ʼn 100 jaar gedoen is. Ons rol is om te organiseer, litigeer en selfstandigheid te bou.”

  • eNuus het ook ‘n insetsel oor die konferensie vervaardig. Kyk eNuus elke aand om 19:00 op kanaal 144 en 145 op DStv.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Basson

“Ek gaan nie toelaat dat ‘n staat vir my voorskryf hoe ek my moedertaal moet gebruik nie”

BRAVO, EERSTEKLAS!!!

Geen keer

Die bestaande universiteite bars nou uit hul nate. So gee hulle nou maar af aan die bevolking wat so wil oorneem. Die probleem is net, by die tyd wat die nuwe privaat universiteite opgerig is, sal die bevolking so gegroeie het dat Afrikaans weer uitgewerk en verdruk sal word. Dit sal my ook nie verbaas as die regering n stokkie sal wil steek voor die oprigting van die privaat skole en universiteite. Hulle gaan rassisme skree dat die wereld wil vergaan.

jaco

Wees dankbaar die onderrigtaal word Engels en nie Zulu of Tswana nie. En lag in julle mou dat diegene wat Afrikaans verguis omdat hulle dink dit was n sogenaamde taal van onderdrukking, dit vervang net n taal waarin daar veel meer onderdrukking was dwarsoor die ou Britse Empire. Hou ook asseblief op met kla. Dit gee wit Afrikaanse mense net n slegte naam. Uiteindelik word ons almal radikaal en onnodig onderdruk weens al die gekla deur slegs n deel van die wit mense. Ek sien nerens dat Afrikaanssprekende kleurlinge kla nie. Ek sien ook nie swart mense kla oor die… Lees meer »

Santie

Die wat niks doen nie is meer skuldig. Ek is trots op my taal.

Maria van Dieweeck

Jaco, hou asseblief op om self so te kla..jy klink soos n anti-Afrikaner.