Bestuurder in swembad ná motor deur muur bars

In ʼn video van die voorval op sosiale media is dit duidelik hoe die motor teen ʼn hengse spoed deur die grensmuur bars [Foto: Port Elizabeth Traffic Updates. Facebook]

ʼn Motorbestuurder het geen ernstige beserings opgedoen nie nadat sy motor deur ʼn grensmuur van ʼn huis in Gqeberha (Port Elizabeth) gebars en hy in die swembad beland het.

In ʼn video van die voorval op sosiale media is dit duidelik hoe die motor teen ʼn hengse spoed deur die grensmuur bars en die bestuurder uit die voertuig geslinger word en in die swembad beland. Die video wys hoe die motor op sy kant op die rand van die swembad tot stilstand kom. Toetse deur die polisie wys ook die man het nie onder die invloed van drank bestuur nie.

Port Elizabeth Traffic Updates het in ʼn inskrywing op Facebook gesê die huiseienaar het die bestuurder daarna uit die swembad gehelp.

Die bestuurder het nie ernstige beserings opgedoen nie [Foto: Port Elizabeth Traffic Updates, Facebook]

“Volgens die nooddienste op die toneel het die bestuurder geen ernstige beserings opgedoen nie. Hy is na ʼn nabygeleë hospitaal geneem vir verdere mediese ondersoek,” lui die inskrywing.

Volgens die inskrywing het die motor op die N2 in Blouwaterbaai gery toe die ongeluk plaasgevind het.

Kapt. André Beetge, polisiewoordvoerder, het aan Maroela Media bevestig geen saak word ondersoek nie.

“Daar is nie ʼn saak van roekelose of dronkbestuur aanhangig gemaak nie nadat polisielede op die toneel was en die bestuurder vir dronkbestuur getoets het,” het Beetge gesê.

Port Elizabeth Traffic Updates

❗❗Accident Alert❗❗This morning a vehicle left the N2 Bluewater Bay – Reports from emergency services that were on scene, driver was luckily to be alive and was transported to nearest hospital with no life threatening injuries – Driver was flung from the vehicle and landed in the pool where home owner assisted in pulling him/her out… ☎️ 082 773 9761

Posted by Port Elizabeth Traffic Updates on Sunday, March 27, 2022

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
ONTPS

Ek sou sê as hy met ‘n hengse spoed deur die muur gejaag het, sou dit juis roekelose en/of nalatige bestuur wees. Die huis met die swembad is tog in ‘n woonbuurt?

Misky

Natuurlik is dit nalatig en spoedgrens is natuurlik oorskry. Iemand is te lui om hulle werk te doen Kapt. Beetge.

Annelize

Roekeloos en nalatig sou ek se moet beslis hier ondersoek word, want daardie man het beslis nie stadig gery nie. Iemand weet nou weer duidelik nie HOE om sy/haar werk te doen nie.

Maritza

Geen roekeloos of nalatig? Sjoe, skrikwekkend as hulle dit goedkeur

Jaco

Geen saak word ondersoek nie. Die bestuurder is seker van die “regte” ras en die huiseienaar is seker van die “verkeerde” ras. Dis mos maar hoe dit gaan in dié simpel SA met die 2 stelle reëls…