Bestuurder ontsnap net voor vragmotor vlam vat

Argieffoto

’n Bestuurder van ’n vragmotor wat olie vervoer, het ’n noue ontkoming gehad toe die vragmotor aan die brand geslaan het ná hy glo beheer verloor het daaroor.

Annine Siddall, woordvoerder van ER24, het gesê die voorval het Saterdagaand omstreeks 22:00 op die N3 tussen Nottinghamweg en Mooirivier plaasgevind.

“Die bestuurder, wat in sy veertigs is, het geringe beserings opgedoen ná hy glo beheer verloor het oor die vragmotor wat sonneblomolie vervoer, en dit in ’n veld ingery en tot stilstand gekom het. Dit het daarna aan die brand geslaan,” het Siddall verduidelik.

Volgens Siddall het hulle die man in die veld langs die brandende vragmotor aangetref met ’n brandwond aan sy hand. “Hy het geweier om na ’n hospitaal vervoer te word.”

Die polisie ondersoek die voorval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae