Die bestuurder van ’n motor is dood toe die motor Vrydagaand in ’n meer in Gqeberha (Port Elizabeth) beland het. Twee passasiers het die voorval oorleef.
Kol. Priscilla Naidu, woordvoerder van die polisie, sê die polisie is omstreeks 22:20 na die Noordeinde-meer in Sydenham ontbied nadat ’n motor in die water beland het.
Die 27-jarige bestuurder van die motor was in die wrak vasgekeer en het verdrink.
Twee passasiers, albei 23 jaar oud, kon daarin slaag om uit die wrak te kom en is na ’n hospitaal geneem vir mediese behandeling.
Die presiese omstandighede omtrent die voorval is nie in dié stadium duidelik nie.
Die polisie doen ’n geregtelike doodsondersoek.
Asseblief !! Dit is Port Elizabeth……ek vloek lank nie meer nie