Bestuurder vermoor tydens vragmotorkaping

Die toneel waar Mnisi se liggaam gevind is. Foto: Verskaf

ʼn Drie-en-vyftigjarige vragmotorbestuurder se liggaam is langs die N2-snelweg buite Port Elizabeth gevind nadat hy die vorige aand gekaap is.

Absalom Mnisi is doodgeskiet nadat die vragmotor wat hy bestuur het Maandagaand deur ʼn groep van minstens sewe verdagtes naby Coega gekaap is.

Die verdagtes het glo langs die pad gestaan met glimbaadjies aan en ’n wit voertuig met ’n blou lig en vir Mnisi gewys om van die pad af te trek voor hulle hom gekaap het, het kapt. André Beetge, woordvoerder van die polisie, gesê.

“’n Motoris wat verbygery het, het die vragmotor gewaar en die maatskappy waaraan die vragmotor behoort, ingelig.” Volgens Beetge is die opsporingstoestel geaktiveer en is die vragmotor in Makepeace-rylaan in Perseverance deur die polisie teruggevind.

Die blitspatrollie-eenheid het die wit Volvo-vragmotor agter ʼn pakhuis gevind. “Sewe verdagtes het in die pakhuis ingehardloop en die polisie kon daarin slaag om vyf van die verdagtes, tussen 27 en 41 jaar oud, in hegtenis te neem.”

Van die goedere waarop beslag gelê is. Foto: Verskaf

Die vragmotor se vrag van nagenoeg 23 ton koper, ter waarde van R1,9 miljoen, en ʼn Mini Cooper-voertuig is op beslag gelê.

“Die polisie het ook beslag gelê op ’n wit Ford Ranger-voertuig (huurmotor), ’n blou lig, ’n glimbaadjie, ’n groot seinblokkeerder en sewe selfone wat glo tydens die kaping gebruik is.”

Mnisi se liggaam is Dinsdagoggend gevind nadat ʼn verbygaande motoris dit gewaar het en die polisie in kennis gestel het. Hy is in die rug en nek geskiet.

Beetge het gesê die polisie ondersoek sake van moord en kaping en dat die verdagtes binnekort in die hof sal verskyn op aanklag van die besit van gesteelde goedere. “Hul aandeel in die kaping en moord word ondersoek.”

Enigiemand met inligting oor die voorval word versoek om lt.kol. Willie Mayi by 082 697 5914 te kontak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Db

Stop vir niemand in die donker nie. Sit jou regtervoet plat op die petrol en jaag na die naaste polisiestasie of sekuriteit. Indien jy nie kan wegkom nie kan die verskoning gegooi word dat die remme nie gewerk het nie

Sarel

Hoeveel gaan die Borg bedrag wees sodat hulle, terwyl op borg Kan voortgaan. My simpatie want die persoon was iemand se Man en Vader wat moes boet net omdat hy sy werk gedoen het om sy familie te onderhou. Moet nie vir jy vertel armoede en werkloosheid is die oorsaak nie,

Lallie Jooste

My innige simpatie aan die oorledene se familie

marous

Land van waansin ! Daar is geen manier wat dit gekeer gaan word nie .

B

RIV :(

‘Groot seinblokkeerder’ – baie bekommerniswaardig.