‘Betogers’ verwoes DBV op Stutterheim

Die DBV van King William’s Town het hul voertuig gestuur en gehelp om 15 honde en 11 katte na veiligheid op dié buurdorp te bring. Foto: Facebook

Werknemers van die Amathlati-DBV op Stutterheim in die Oos-Kaap kry traumaberading nadat sowat 20 vermomde oproermakers gedreig het om die huis aan die brand te steek waarin hulle op die perseel vasgekeer was.

Yolandi Leslie, die plaaslike DBV-inspekteur, en Michelle Deysel, wat in die kantoor werk, het Maandagoggend die voordeur toegehou nadat betogers werkers met geweld gedreig het as hulle die dag werk toe sou kom na die DBV-perseel langs die township, waar oproer reeds weke lank gereeld opvlam.

Leslie en Deysel het diere in die hokke kos en water gaan gee toe sowat 20 mans met balaklawas vermom op hulle afgestorm en hulle by die agterdeur in die kantoor ingedwing het, vertel Leslie.

Dit het hulle kans gegun om by deur die voordeur te ontsnap en na die huis te vlug.

Sowat 25 honde en katte was van die oggend tot laatmiddag sonder kos nadat die DBV se werkers vir hul veiligheid moes vlug. Foto: Facebook

Terwyl van die mans, wat sy skat tussen 18 en 20 jaar oud is, sakke hondekos weggedra het, het die res in Xhosa staan en redekawel oor of hulle Leslie en Deysel leed sou aandoen. Dit het hulle kans gegun om by die voordeur uit te ontsnap en na die huis te vlug waarin die twee vroue op die perseel woon.

Die betreders het agter hulle aan gehardloop en op hulle geskree hulle gaan die huis afbrand met hulle daarin toegesluit. Leslie sê sy het aanhoudend die paniekknoppie gedruk om die veiligheidsmaatskappy te ontbied, maar hulle moes bontstaan om oproeriges daar naby te beheer wat petrolbomme gegooi en buitebande op straat aan die brand gesteek het.

Die sogenaamde betogers het die meeste van die DBV op Stutterheim se hondekos weggedra en die kantoor en huis geplunder, waarna hulle albei geboue se inhoud verwoes het. Foto: Facebook

Leslie sê sy vermoed die mans het eindelik padgegee omdat sy aanhoudend die paniekknoppie gedruk het wat ʼn alarm laat afgaan. Lede van die polisie se eenheid vir openbare orde het opgedaag en haar en Deysel enkele oomblikke gegee om die nodigste bymekaar te kry.

Leslie het die honde op die erf vir hul eie veiligheid by die hek uitgelaat sodat hulle kon weghardloop, maar in daardie stadium kon hulle niks vir die honde en katte in die hokke doen nie.

Toe hulle laat Maandagmiddag onder polisiebegeleiding terugkeer om die diere in die hokke te ontruim, vertel Leslie, het hulle gesien die oproermakers het deur die loop van die dag teruggekeer en verwoesting gesaai.

Dit lyk asof hulle een van ons jong bokke doodgeskop het.

“Dit lyk asof hulle een van ons jong bokke doodgeskop en ʼn kalkoen geslag het,” sê Leslie. Hulle het die bok net so gelos.

Die huis waarin twee werknemers van Stutterheim se DBV op die perseel woon, is geplunder. Foto: Verskaf

“Hulle het alles wat hulle nie uit die huis kon wegdra nie, verwoes. In die kantoor het hulle papiere opgeskeur, telefoonkabels uitgeruk en die plek geplunder,” sê sy. “Hulle het selfs ʼn muur in die kantoor uitgebreek om nog hondekos te steel.”

Met die hulp van King William’s Town se DBV wat ʼn voertuig gestuur het en Stutterheim se bakkie en sleepwa kon Leslie en haar kollega 15 honde en 11 katte na veiligheid op die buurdorp bring. Sy bly intussen by haar kêrel op ʼn plaas buite die dorp, terwyl Deysel by haar ma op die dorp bly.

Leslie sê sy is Sondagaand na ʼn toneel ontbied waar ʼn motor ʼn koei getref het. Betogers het toe die DBV se bakkie met klippe bestook, maar sy het gemeen dis net omdat hulle nie wou hê mense moet in die omgewing van die township rondry nie.

Sy sê sy sou nooit kon dink dat die situasie die volgende oggend so sou versleg dat hulle vir hulle lewe sou moes vlug nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
Natalie Luxmore

Ek is stom. Ek verstaan dit nie. Wat bereik iemand deur n DBV instansie aan te val. Verduidelik asb.

Ciska

Ag Here asseblief nie die arme diere nie! Wat ‘n nagmerrie hel van ‘n land!

RG

HET ons nog leiers in die land? Anargie, ons is nou daar.

Jozi

Ek glo dat ieder en elk van ons wat hierdie artikel lees absoluut stom geslaan sit.
Daar is nie woorde om my emosies te beskryf nie.
Ek kla hulle vandag elkeen by die Here aan. Hy ken hulle by die naam. Mag hulle nie ongestraf bly nie.

Cornelia

En tog is mens nie regtig stomgeslaan nie. Die lesse vd geskiedenis getuig van hierdie helse dade. Het ons voorouers nie dieselfde gruwels en bloeddors aanskou en deurgemaak nie. Dalk moes ons ons volksvryheid as ‘n Genadegawe soos ‘n kosbare juweel beskerm het. Die land steier onder die aanslae wat onbeheersd deur die wanregeerders, gevoed word tot op die dag van afrekening.