Beurtkrag binnekort opgehef

André de Ruyter (Skermskoot uit vorige perskonferensie)

Beurtkrag sal Donderdag 12:00 na fase 2 afgeskaal word voordat dit na verwagting voor die naweek opgehef sal word.

André de Ruyter, Eskom se uitvoerende hoof, het Donderdag tydens Eskom se derde nuuskonferensie in soveel dae gesê die kragnetwerk toon goeie herstel en Eskom sal Vrydag omstreeks 05:00 in die posisie wees om beurtkrag op te hef.

Die kragvoorsiener voorspel wel vanaand ’n piekvraag van 28 266 MW na krag en beurtkrag sal vir eers nog geïmplementeer moet word om aan dié vraag te voldoen, voordat dit môre vroegoggend opgeskort sal kan word.

Beskikbare kapasiteit staan in dié stadium op 28 266 MW terwyl 2000 MW as reserwes in berekening gebring moet word om voorsiening te maak vir onbeplande onderbrekings.

De Ruyter was bly om aan te kondig die land se damme is in dié stadium so te sê vol, met slegs een of twee uur se krag wat nog benodig word om water te pomp. Die kragvoorsiener kon ook sy dieselvoorraad hervul vir noodreserwes.

Drie eenhede ondervind tans gedeeltelike kragverliese wat 895 MW uit die kragnetwerk haal.

Koeberg

(Argieffoto: Armand Hough/ANA)

Eskom se bestuur moes vanoggend nie net vrae oor beurtkrag beantwoord nie, maar ook oor die beplande instandhoudingswerk by die Koeberg-kragstasie. Albei eenhede daar sal volgende jaar opeenvolgend afgeskakel moet word sodat die stoomkragopwekkers vervang kan word.

De Ruyter het gesê dié onderbrekings sal die ingewikkeldste nóg in Koeberg se geskiedenis wees, terwyl Eskom in die proses 928 MW aan kapasiteit per eenheid vir ʼn lang tydperk kwyt sal wees.

Die moontlikheid van beurtkrag dán kan nie uitgeskakel word nie.

Die instandhoudingswerk is volgens De Ruyter egter onvermydelik aangesien die aanleg nie nóg 20 jaar met die huidige stoomkragopwekkers bedryf sal kan word nie.

De Ruyter meen Eskom het alles moontlik gedoen om vir die onderbrekings voor te berei.

Só kan Suid-Afrikaners help spaar aan krag

Argieffoto bloot ter illustrasie. (Foto: Unsplash)

Die kragvoorsiener het op die jongste nuuskonferensie weer eens ’n beroep op landsburgers gedoen om krag te bespaar.

De Ruyter het daarop gewys dat Suid-Afrika tans 14 miljoen huishoudings het en sou elkeen van dié huishoudings slegs een onnodige lig afskakel, altesame 835 MW bespaar kan word. “Dit is meer as een eenheid by ’n groot kragstasie soos Medupi.”

Daar is ook tans 675 000 swembaddens in die land. Indien elkeen van dié swembaddens se pomp vir slegs een uur minder per dag hardloop, kan 506 MW bespaar word terwyl 743 MW bespaar kan word sou elke landsburger sy of haar geiser se temperatuur na 60 °C verlaag en dit tydens piektyd, veral saans, afskakel.

De Ruyter meen dié besparings is genoeg om ’n groot stad soos Tshwane se kragverbruik te dek.

Eskom se baas het op ’n vraag van ’n verslaggewer geantwoord dat die kragvoorsiener Suid-Afrikaners se “frustrasie, woede en irritasie” oor beurtkrag verstaan en begrip het daarvoor.

Eskom sal solank beurtkrag voortduur daagliks nuuskonferensies hou om Suid-Afrikaners op die hoogte van die situasie te hou. Die volgende konferensie sal na verwagting Vrydag om 10:00 plaasvind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Parmantige samaritaan

Dankie vir goeie nuus Mnr de Ruiter. Nou moet ons net van die kanker eff ontslae raak.

Catherina

Kry die man jammer

ES

Ek het aan die begin my bedenkinge oor Mnr de Ruyter gehad maar ek dink hy maak beter vordering as sy voorganger. Dis net jammer dat dit nooit weer die ESKOM van ouds sal wees nie. Die skade is klaar aangerig.

marius

Wat het nou skielik verander ?

Adeline

1. Mnr de Ruiter jy is ‘n held in my oë om die volgende redes. a) die korrupte cANCer munisipaliteite wat geld weerhou het van Eskom en nie hulle rekeninge betaal het nie maar die geld in hulle sak gedruk het vir eie gebruik. b) die toelaat van die arrogante onwettige op koppelings van krag misbruik deur diefstal van hierdie “ras gebaseerde” kriminele (wat met hoogs kreatiewe idees) die krag eenhede ens laat opblaas en of ingee het met oorlaai van krag diefstal. Waar die polisie of weermag toekyk en niks doen. c) die diefstal van krag kabels en selfs… Lees meer »