Beurtkrag na fase 4 verhoog, maar Eskom sê gʼn ‘rede tot kommer’

(Argieffoto)

Suid-Afrikaners moet hulle staal vir nog dae lange beurtkrag. Eskom het kort gelede aangekondig dat fase 4-beurtkrag nou van Woensdag om 12:00 sal geld. Die kragvoorsiener sê egter die inwerkingstelling van ʼn hoër fase is nie “rede tot kommer nie”.

Fase 4 duur tot Vrydag om 05:00, waarna teruggeskakel word na fase 2. Dit sal in hierdie stadium tot Saterdag om 05:00 geld.

Sikonathi Mantshantsha, woordvoerder van Eskom, sê eenhede by Medupi, Kusile en Matla het oor die afgelope 24 uur uitgeskop, terwyl Eskom gedwing is om ʼn eenheid by onderskeidelik die Lethabo- en Arnot-kragsentrale af te skakel.

“Dit het druk op die kragstelsel vererger en die uitgebreide gebruik van noodopwekkingsreserwes genoodsaak wat die herstel van hierdie reserwes belemmer,” sê Mantshantsha.

Sommige opwekkingseenhede is intussen weer in diens gestel en Eskom verwag om nog twee eenhede deur die loop van die dag aanlyn te bring. Koeberg se eenheid een sal na verwagting vandag in bedryf gestel word en dit sal binne 48 uur volle kapasiteit kan lewer.

Die kragvoorsiener sê meganiese probleme het tot ʼn verlies van 14 957 MW gelei, terwyl beplande instandhoudingswerk nog 5 301 MW uit die netwerk gehaal het.

“Ons herinner verbruikers daaraan dat beurtkrag die laaste opsie is om die bestendigheid van die stelsel te handhaaf, ongeag watter fase ingestel word. Die inwerkingstelling van fase 4 wek dus geen kommer nie, omdat die kragnetwerk steeds doeltreffend beheer word,” sê Mantshantsha.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

64 Kommentare

jongste oudste gewildste
Diline

O genade dit raak nou te erg! Plaas daarvan om beter te word, word dit al hoe erger. Hulle kan net sowel die krag heentemal afsit.

Misky

Ons land beweeg teen ‘n vinnige tempo agteruit. Nie lank nie, dan is ons terug in die oertydperk en net stof om ons

Werner

Dink dit is nou tyd om bekommerd te raak.

cccp

Jou huis is besig om af te brand en jy is op die boonste verdieping in die slaapkamer vasgekeer – maar daar is geen rede tot kommer nie…

Pierre

“Die inwerkingstelling van fase 4 wek dus geen kommer nie, omdat die kragnetwerk steeds doeltreffend beheer word,”

Julle is heeltemal uitvoeling met mense se bekommernisse !!