Beurtkrag tydelik opgeskort

Eskom het beurtkrag Dinsdag tydelik opgeskort. (Argieffoto: Mujahid Safodien/AFP)

Nadat verskeie opwekkers weer in diens gestel kon word, het Eskom beurtkrag Dinsdag tydelik van 04:00 af opgeskort.

Die verligting is egter van korte duur.

Volgens die kragvoorsiener sal fase 2-beurtkrag weer om 17:00 hervat word en tot 22:00 duur.

Eskom sê daar was ʼn verbetering in die kragnetwerk se vermoë nadat beurtkrag Sondag op baie kort kennisgewing in werking gestel is.

“Oor die afgelope 24 uur het Eskom-spanne sewe opwekkingseenhede weer in diens gestel. Dit het gehelp om druk te verlig en Eskom in staat gestel om beurtkrag in dié stadium op te skort.

“Dit is egter onvoldoende vir die aandspitstyd. Fase 2-beurtkrag gaan dus weer van 17:00 af tot 22:00 in werking gestel word,” lui ʼn verklaring wat Eskom in die vroeë oggendure uitgereik het.

Eskom het Sondag gesê tien kragopwekkers by sewe kragstasies het in die voorafgaande 24 uur onklaar geraak en tot beurtkrag gelei.

Drie eenhede by die Tutuka-kragsentrale het onklaar geraak weens ʼn gebrek aan lugdruk. Nog ʼn opwekker het by die Kriel-kragstasie onklaar geraak weens ʼn lekkasie in die ketelpyp, terwyl daar ook probleme by die Kusile-, Medupi- en Duvha-kragsentrale ondervind is. Die onderbrekings het gelei tot ʼn algehele verlies van meer as 6 000 MW opwekkingskapasiteit.

“Die vooruitsig vir die res van die week gaan na verwagting verbeter terwyl Eskom-spanne onophoudelik werk om meer opwekkers in diens te stel.

“Ons ondervind tans hoë aandspitstye, wat tekenend is van die winteraanvraagtydperk. Sou opwekkingskapasiteit verder versleg, kan beurtkrag weer nodig wees, waarskynlik tussen 17:00 en 22:00 in die winter.”

Eskom het ʼn beroep op verbruikers gedoen om elektrisiteit spaarsaam te gebruik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
annie

Is dit dieselfde ou wat per donkiekar na die baie stukkende Eskomstasies moet jaag om al die probleempies reg te dokter wat ook die grafieke en inligtingstukke en kaarte en verduidelikings moet opstel waarop ons kan sien wanneer ons weer krag moet skenk vir die laebloeddruk, futlose en rigtinglose, lekkende ou Eskom?

Persheks Adri

Dis nou sommer snert hierdie! Ek sal my generator se rekening vir die patete stuur aangesien ons klaar so baie betaal en nou nog onnodige uitgawes vir die patesiese diens waarvoor ons betaal, maar nie die diens ontvang nie patete pffft!

N

Ons raak bly as beurtkrag opgeskort word. Van wanneer af is dit normaal?. Ons land is in die moeilikheid.

JM

Beurtkrag gaan deel van ons woordeskat bly tot in lengte van dae. Net nog ‘n patetiese en onbeholpe Afrikaland. Waarom moet enigiets werk?!

Misky

Ek het so tydjie terug ‘n ou koerant gesien en dit was voorbladnuus toe Pretoria middestad sonder krag was vir ‘n dag. Ek dink dit was in die jare 60 of 70, maar dekades terug. Ons is besig om terug te beweeg na die oertyd. Alles te danke aan die ANC