[Video] Bevorder wit man, gelas hof

Jan Pretorius. Foto: Reint Dykema

Jan Pretorius. Foto: Reint Dykema

Die Tshwane-metro is beveel om ʼn wit man te bevorder en terugwerkend te vergoed nadat die arbeidshof in Johannesburg bevind het daar is onbillik teen hom gediskrimineer.

Die arbeidshof het vandeesweek bevind dat die gebruik van ’n kwotastelsel in die werkplek onwettig is. Dié uitspraak is gelewer na aanleiding van Solidariteit se hofsaak oor onbillike diskriminasie teen die Tshwane-metro. Kragtens die hofuitspraak moet die munisipaliteit Jan Pretorius, ’n water-ouditbeampte, bevorder en terugwerkend vergoed.

Regter Faan Coetzee het onder meer bevind dat die munisipaliteit onbuigsaam opgetree het toe hy Pretorius telkens vir bevordering oor die hoof gesien het. Die hof het voorts bevind dat die munisipaliteit se aanstellingsbeleid, waarvolgens daar suiwer op grond van ras en geslag teen Pretorius gediskrimineer is, op ’n kwotastelsel neerkom wat strydig met die Wet op Diensbillikheid is.

Dr. Dirk Hermann, bedryfshoof van Solidariteit, het gesê die hof het in sy uitspraak daarop gewys dat die munisipaliteit se aanstellingsbeleid slegs op syfers sonder meetbare doelwitte berus. “Dit kom dus neer op die subjektiewe uitsluiting van individue van die nie-aangewese groep. Die uitspraak maak dit egter duidelik dat staatsdepartemente sonder regstellendeaksieplanne nie agter beleidsdokumente sonder behoorlike regstelteikens en meetbare doelwitte kan skuil nie,” het Hermann gesê.

Hermann meen vandeesweek se hofuitspraak is enig in sy soort aangesien dit die eerste keer is dat die hof bevind het dat daar deur middel van ʼn kwotastelsel onbillik teen ’n wit man gediskrimineer is. “Die hof het bevind dat om poste net aan die hand van die nasionale rassedemografie te vul óf selfs vakant te laat ten koste van geskikte wit mans, onwettig is. Die hof het voorts bevind dat die munisipaliteit geen regsgronde gehad het om ʼn toepaslik gekwalifiseerde kandidaat uit die onderhoudproses te laat nie. Boonop het hulle ook nie in ag geneem dat die pos ʼn skaars vaardigheid vereis nie,” sê Hermann.

Hermann het bygevoeg dat alle werkgewers kragtens vandeesweek se uitspraak gedwing word om voortaan ʼn genuanseerde benadering tot regstellende aksie te volg. “Die uitspraak het weereens bevestig dat numeriese teikens in regstelplanne of beleidsdokumente ʼn verskeidenheid faktore in ag moet neem. Hierdie uitspraak skep dus die nodige regsgronde vir toekomstige sake waarin daar op grond van kwotas onbillik teen individue van die nie-aangewese groep gediskrimineer word,” het Hermann bygevoeg.

Kragtens vandeesweek se hofbevel moet Pretorius op 1 Mei 2016 amptelik in die pos voorman: ambagte, wat tans steeds vakant is, aangestel word. Die munisipaliteit moet ook terugwerkende vergoeding aan Pretorius betaal. Die vergoeding behels die verskil tussen sy huidige salaris en die salaris wat hy as voorman: ambagte gedurende die tydperk 8 Oktober 2013 tot 30 April 2016 sou verdien het.

Pretorius, wat sedert 1999 vir die departement van water en sanitasie werk, is in Augustus 2012, en weer in Julie 2013, weens sy velkleur oor die hoof gesien toe hy vir die pos voorman: ambagte aansoek gedoen het. Dit is ten spyte van die feit dat Pretorius deur ʼn paneel as die mees geskikte kandidaat vir die posisie aangewys is. Die munisipaliteit het boonop nie in hierdie tyd oor ’n goedgekeurde regstellendeaksieplan beskik nie.

Die pos waarvoor Pretorius aanvanklik in 2012 aansoek gedoen het, is weer in Julie 2013 geadverteer. Pretorius het toe ʼn tweede keer aansoek gedoen vir die pos, maar is hierdie keer nie vir ʼn onderhoud genooi nie en ook nie op die kortlys geplaas nie. Nadat Pretorius ʼn grief hieroor by die munisipaliteit ingedien het, is hy in Oktober 2013 in kennis gestel dat geen wit mense vir die pos oorweeg mag word nie.

Die Tshwane-metro het in Mei 2013 ’n regstellendeaksieplan, terugwerkend vir die tydperk van 1 Julie 2012 tot 30 Junie 2017, aanvaar. Pretorius is glo op grond van hierdie plan nie in die pos waarvoor hy aansoek gedoen het, aangestel nie. Die plan bevat ʼn resolusie wat bepaal dat geen wit mens in die genoemde posisie aangestel mag word nie.

[wpvideo hIo7Gau0]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Roy

Ek is baie bly dat Solidariteit Jan Pretorius se saak aan gevat het en dit gewen het, want as jy so rondom jou kyk sal jy sien wat aangaan met water en sanitasie projekte omdat hulle nie die regte en opgeleide persone die poste gee wat hulle toekom nie want die person wat diue aanstellings doen weet ook meeste van die tyd nie eers wat aangaan nie

SkarrelKind

Behalwe dat ek baie bly is vir Jan, is ek ook bly dat geregtigheid ‘n slag vir ‘n blanke manlike persoon in die werkplek geskied het. Solidariteit is YSTER! Baie dankie julle ouens.

Piet Pompies

Small step for man, huge step for mankind.
Geregtigheid danksy Solidariteit

Hannelie

Klink vir my na ‘n rassistiese munisipaliteit. Elke keer oor die hoof gesien, alhoewel hy die beste kandidaat is, kon seker nie ‘n “bevoegde” swarte kry vir die pos nie. Stel mens aan op grond van kennis, dan sal ons land weer wees wat hy was voor mense net in ‘n pos “gesit” word op grond van BBEEE.

Jo

Dit is voorwaar n MYLPAAL vir blankes wat behaal is. Puik Solidariteit!!!?