Bieradvertensie moet verwyder word oor ‘giftige manlikheid’

‘n Skermgreep van die advertensie.

ʼn Advertensie van Windhoek Lager moet van die lug af gehaal of verander word, het die Advertensiebeheerraad (ARB) besluit.

ʼn Lid van die publiek, Aadila Agjee, het gekla dat die Windhoek-advertensie, waarin die akteur Gerard Butler te sien is, aanstootlik is en mense verkleineer oor hul persoonlike voorkeure.

Die advertensie wys onder meer waar Butler by ʼn kroeg sit en ʼn ander man ʼn bier by die kroegman kry en vra of hy lemmetjie saam met sy bier kan kry. Butler draai dan om en sê dit is Windhoek wat 100% bier is en dat hy nie lemmetjie saam met sy bier benodig nie. Butler sê dan: “Keep it real, Joe”, en die advertensie eindig uiteindelik met ʼn stem wat sê: “Keep it real with 100% pure beer.”

Agjee meen die advertensie is aanstootlik aangesien die man verkleineer word omdat hy ʼn sny lemmetjie saam met sy bier versoek het.

Heineken Suid-Afrika, wat Windhoek brou, het in reaksie op die klag gesê die advertensie het ten doel om te benadruk dat Windhoek Lager ‘n suiwer bier is en nie enige geurmiddels benodig nie. Daar is verder aangevoer dat die man wat die lemmetjie versoek het dit uit gewoonte doen maar nadat hy Windhoek geproe het, het hy dit sonder die lemmetjie waardeer.

Volgens die ARB het hy “informele agtergrondnavorsing” gedoen ten einde tot sy besluit te kom. Die ARB is van mening dat hoewel dit nooit uitdruklik gesê word nie, die advertensie probeer sê dat “regte mans regte bier drink”. Dit word geskep deur die manlike interaksies en die rolverdeling wat net uit mans bestaan.

“Hierdie tipiese manlike interaksie skep ʼn onuitgesproke dialoog: regte mans drink regte bier, en dat mans nie suurlemoen- of lemmetjieskywe in hul bier het nie. Hierdie ongesproke dialoog word verder beklemtoon deur die gebruik van Butler, ʼn akteur wat bekend is vir sy rolle in aksieflieks.”

‘n Skermgreep van die advertensie.

Die ARB het gesê hy het ook opgemerk dat die karakter wat deur Butler geterg word, ʼn saggeaarde, rooikopman is en dat dit “twee eienskappe is wat gewoonlik in ʼn toksiese omgewing tot gevolg kan hê dat hy as ʼn teiken gesien word om te terg”. Die tipe interaksie sou volgens die ARB miskien aanvaarbaar gewees het as dit “tong-in-die-kies” was of indien humor gebruik is om aan te dui dat die interaksie nie “normaal” of “aanvaarbaar” is nie.

Die ARB het bevind dit is juis die “onuitgesproke aard” van die kommunikasie in die advertensie wat dit besonder gevaarlik maak – die geslagstereotipe wat so normaal uitgebeeld word dat dit nie eens verduideliking nodig het nie. Ingevolge die ARB se reëls word geslagstereotipering of negatiewe geslagsuitbeelding nie in reklame toegelaat nie, tensy sulke stereotipering of uitbeelding redelik en regverdigbaar is in ʼn oop en demokratiese samelewing gegrond op waardigheid, gelykheid en vryheid.

Die ARB het gesê dit is die verskansing van die rol van mans dat hulle op ʼn sekere manier moet optree, wat hom pla. “Dit is ook die verskansing van manlike gedrag wat boelie, en wat as ‘giftige manlikheid’ bestempel word. Die advertensie skets ʼn duidelike beeld van ʼn aspek van die teikenmark en daardie mark is ʼn stereotipe macho-man wat swig onder die druk van sy eweknieë om in te pas.”

Die ARB het bevind die advertensie oortree sy reëls en dat die advertensie onmiddellik van die lug gehaal of verander moet word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
Nie Verbaas

Ag siestog.

MakersMark

Wat ‘n grap. As hy cane en raspberry gedrink het was die advertensie seker ok……

Chris dupreez

Hoe kleinlik kan iemand nou wees,

Elsabe

Ag hel tog…

Adri

Belaglik!