Bisarre wending: Ace hef sy skorsing op en ‘skors’ Cyril

Ace Magashule (Foto: Simphiwe Mbokazi/African News Agency/ANA)

Die ANC het gesê hy neem kennis van Ace Magashule, geskorste sekretaris-generaal van die party, se brief waarin hy aankondig dat hy pres. Cyril Ramaphosa uit die ANC “skors”.

Die egtheid van die dokument is onmiddellik bevraagteken, maar Magashule het aan verskeie joernaliste bevestig dat dit eg is waarna die ANC ʼn verklaring uitgereik het.

“Die besluite van die ANC se nasionale uitvoerende komitee (NUK) en nasionale werkkomitee (NWK) bly van krag,” het Pule Mabe, ANC-woordvoerder, laat Woensdagaand in reaksie gesê.

Magashule is Maandag ingelig oor sy skorsing uit die regerende party. Hy het ʼn brief ontvang wat deur Jessie Duarte, adjunk-sekretaris-generaal van die ANC, onderteken is, wat lui dat hy vanaf 3 Mei tydelik geskors word, hangende die finale uitslag van die strafsaak teen hom. Magashule is met volle voordele geskors.

Magashule het egter Woensdagaand ʼn verklaring uitgereik waarin hy onmiddellike appèl teen sy skorsing aankondig en volgens hom is sy skorsing nou “opgehef” tot sy appèl aangehoor en gefinaliseer is.

“Ek het ook, in ooreenstemming met die magte wat aan my as die sekretaris-generaal van die ANC toevertrou is en in volle nakoming van die betrokke konferensieresolusies, die president van die ANC, kameraad Cyril Ramaphosa, summier geskors,” lui die dokument.

In nog ʼn uitgelekte dokument voer Magashule aan dat Ramaphosa geskors word oor sy CR17-veldtog wat ingespan is om “geld in te samel in ʼn poging om die takke sover te kry om jou uiteindelik tot president van die ANC te verkies”. Die CR17-veldtog was reeds die onderwerp van verskeie ondersoeke.

Pres. Cyril Ramaphosa . (Foto: Siya Duda/GCIS)

Volgens die ANC sal die NUK oor die naweek vergader en dan reageer op Magashule se uitlatings. “Die ANC versoek die sekretaris-generaal om die besluite van die NUK te respekteer en hom aan die dissipline van die organisasie te onderwerp.”

Magashule voer verder aan dat Duarte nie by magte was om die skorsingsbriewe aan hom en ander ANC-lede uit te reik nie en dat dit dus ongrondwetlik is. Hy moedig die ANC-lede wat skorsingsbriewe ontvang het aan om ook te appelleer.

Tydens sy skorsing word Magashule verbied om enige van sy pligte as sekretaris-generaal uit te voer. Hy mag nie die ANC in die openbaar of op enige ander platform verteenwoordig nie, geen openbare uitsprake maak wat verband hou met die organisasie nie, asook nie deelneem aan die mobilisering van ANC-strukture, enige ander organisasie of mense nie.

“Ek doen ʼn beroep op alle lede van die ANC om met revolusionêre waardigheid en respek op te tree en die ANC-grondwet te handhaaf. Niemand van ons moet buig voor onwettige en ongrondwetlike optrede nie. Sodoende moet ons die eenheid van die ANC as leier van die samelewing beskerm,” sluit Magashule af.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

69 Kommentare

jongste oudste gewildste
Pieter

Nog altyd gese julle ANC is die grootste sirkus in afrika. Gaan almal van julle terug skool toe en gaan maak graad een klaar asb

Hannes

Ha Ha hier begin die sirkus!!!

Snowball

‘n Jakkalsdans of die laaste stuiptrekkings van ‘n desperate kader? Nietemin narsisime op sy beste!

Tanja

Sirkus

Willem

Koop daai man ń Bells. Hy is nie bang nie. HAHAHA