Blade kap terug oor Afrikaans

Dr. Blade Nzimande, minister van hoër onderwys en opleiding. (Foto: Kopano Tlape/GCIS)

“Afrikaans moet nie gebruik word as ’n middel om ’n eng, rassistiese Afrikanernasionalistiese agenda na te streef, soos die geval onder apartheid was nie. Afrikaans hoort in ’n demokratiese Suid-Afrika en moet van ’n wit, regse agenda gered word.”

Só het dr. Blade Nzimande, minister van hoër onderwys, Woensdag gesê nadat die DA ’n klag by die Verenigde Nasies (VN) se Organisasie vir Opvoedkunde, Wetenskap en Kultuur (Unesco) aanhangig gemaak het oor die departement se nuwe taalbeleidsraamwerk vir hoër onderwys.

Die DA versoek dat die VN sal ingryp om Nzimande en die regering te dwing om Afrikaans sowel as die Khoi-, San- en Nama-taal as volwaardige inheemse Suid-Afrikaanse tale in dié beleid te erken.

Nzimande sê in ʼn verklaring die feit dat Afrikaans en ander tale oënskynlik nie aandag in die departement se taalbeleidsraamwerk geniet nie, beteken nie daar word teen enige Suid-Afrikaanse taal gediskrimineer nie.

“Inteendeel, die beleidsraamwerk bevestig alle Suid-Afrikaanse tale en pleit doelgerig vir hul vakkundige ontwikkeling.”

Boonop, sê die minister, word daar uitdruklik na Khoi-tale in die beleid verwys as tale wat ook ondersteuning nodig het.

“Dit is teenstrydig met die bewering van die DA dat Khoi-tale vir vakkundige ontwikkeling uitgesluit word.”

Nzimande sê die hersiene beleidsraamwerk poog hoofsaaklik om die ontwikkeling van histories onderontwikkelde Afrikatale te bevorder, veral dié wat amptelike status in die Suid-Afrikaanse Grondwet geniet.

Nzimande het die afgelope maande veral deurgeloop oor die beskrywing van Afrikaans as ʼn “uitheemse taal” in die beleid.

“Afrikaans en ander tale wat nie aandag in die beleidsraamwerk geniet nie, moet binne die breër konteks gesien word van dit wat die beleidsraamwerk wil bereik, en nie bloot hoe hierdie tale in die beleidsraamwerk gedefinieer word nie,” sê hy nou.

Die nuwe taalbeleidsraamwerk tree in Januarie 2022 in werking, en die DA hoop dat die internasionale gemeenskap die party sal help om die regering te dwing om voor daardie datum Afrikaans sowel as die Khoi-, San- en Nama-taal as volwaardige inheemse tale te erken wat ook geregtig is op ondersteuning en erkenning.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
Heinrich

Blade is so stiksienig hy besef nie sy nuutste antwoord bevestig juis die gronde vir die klag nie. Sy politieke party kon nog nooit iets opbou nie en vir ‘n minderheidsgroep om ‘n taal tot die vlak op te bou wat ons het, moet hom jaloers en minderwaardig laat voel so onmiddelik kom die apartheidskaart uit. Sies tog, wys my iets wat die ANC kom opbou het…

Spook

“Afrikaans moet nie gebruik word as ’n middel om ’n eng, rassistiese Afrikanernasionalistiese agenda na te streef”

Nee wat ou Lemmetjie, jy doen dit sommer met INGILS.

Misky

Hierdie ou grou sy gat net al dieper en dieper…… hoop hy gaan HARD val!!!!

Jasper

Die geindoktrineerde siel moet besef dat sy taal nog meer uitheems is as Afrikaans. Inteendeel het Afrikaan op landsbodem ontwikkel. Nederlands en die koi-tale was ook in die Kaap gevestig lank voordat die swart tale die visrivier gekruis het.

Skim

Ek wonder hoe hulle verskonings sou kon uitdink as daar nie woorde soos apartheid en rassisme was nie. Hul kan maar net nie wegbeweeg van die verlede af nie.