BLF wil hê FNB4 moet weer aangestel word

BLF-lede het Maandag na FNB opgeruk (11 September 2017) Foto: Siphelele Dludla/ANA

Andile Mngxitama se Black First Land First (BLF)-beweging het Maandag na die hoofkantoor van FNB opgeruk in ʼn poging om die bank oor te haal om weer vier werknemers aan te stel wat afgedank is nadat hulle politiek op hul werk se sosialemediakanale en in professionele e-posse bespreek het.

Ongeveer 100 BLF-lede het Maandag, onder die polisie se wakende oog, by Gandhi-plein in die Johannesburgse middestad bymekaargekom om na FNB Bank City op te ruk ná ʼn onsuksesvolle vergadering met FNB se uitvoerende hoof, Jacques Celliers.

Siphesihle Jele, Simon Masimula, Sipho Coke en Xolani Nkosi is verlede maand afgedank vir “politieke praatjies en beledigende taalgebruik” nadat die bank verlede jaar vir ʼn paar maande lank hul professionele e-posse en WhatsApp-groepgesprekke gemonitor het.

Hulle het as premium bankiers by FNB in Inanda, Sandton, gewerk.

Die voormalige werknemers glo hulle is onregverdig afgedank en voer aan hulle het hul reg tot vryheid van spraak en reg tot privaatheid uitgeoefen.

Thandiswa Yaphi, algemene sekretaris van BLF, het Celliers daarvan beskuldig dat hy nie swart mense respekteer nie en dat hy ʼn “regimeveranderingsagent” is en gesê die werknemers is afgedank omdat hulle transformasiekwessies by die bank aangeroer het.

Volgens Yaphi het die BLF gesprekke gehad met die vier voormalige werknemers en hulle het ʼn prokureur gekry sodat die saak hof toe kan gaan.

“Celliers respekteer nie swart mense nie. Ons weet Celliers ondersteun ʼn staatsgreep teen pres. [Jacob] Zuma en hy is ʼn regimeveranderingsagent omdat hy Save SA gefinansier het omdat hy die president van Suid-Afrika wou verwyder, al is hy wettig verkies,” het Yaphi gesê.

“Ons sê dat FNB en die bankbedryf getransformeer moet word, want swart mense is ʼn meerderheid. Ons wil nie posisies beklee nie, ons wil die banke besit. Ons wil hê die banke moet aan die regering behoort.”

BLF het twee weke gelede ʼn brief geskryf aan Celliers en ʼn dringende vergadering versoek om ʼn oplossing te vind vir die vier afgedankte werknemers.

Privaat veiligheidsbeamptes en ʼn swaar polisieteenwoordigheid het egter die party ingewag toe hulle in daardie week na die bank opgeruk het en aangesê is dat Celliers nie by die hoofkantoor is nie.

Dis nie duidelik of BLF Maandag met Celliers kon vergader nie.

FNB wou nie kommentaar lewer oor die besonderhede rondom die afdanking van die werknemers nie en gesê hy kan nie in gesprek tree met derde partye oor dié saak nie, weens die “vertroulike aard van interne prosesse”.

“Die bank bevestig dat die saak ʼn deeglike en streng interne dissiplinêre en KVBA-proses gevolg het en dit is byna ʼn jaar gelede afgehandel. Die proses is vertroulik om die regte van die bank en die betrokke individue te beskerm,” het FNB per e-pos gesê. “FNB benadruk dat hy elke werknemer se konstitusionele regte tot privaatheid en vryheid van assosiasie respekteer en ontken die bewering dat privaat kommunikasie gemonitor is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
David

Moet ons regtig oor die ou komentaar lewer. …..

Ruben

Hoekom volg joernaliste die mense hou op hulle in die nuus sit dan verdwyn die goed

Irene

Wie en wat is blf

Manie

Ek sal baie graag wil weet wie sit met die geld agter die blf. Hulle is opregte rassiste

Luke

Irene. Die naam beskrywing staan in die berig. Black first land first. Jy is welkom om dit te google. Jy sal na baie berigte gelei word en al die argumente sien wat die organisasie aanvoer. As jy gelukkig is sal jy ook die naam Bell Pottinger raak lees in van hierdie berigte.