Blitspatrollielede aangekla oor polisiebeampte se moord

Argieffoto

Twee lede van die Soweto-blitspatrollie is Maandag in hegtenis geneem in verband met die moord op ʼn polisiebeampte in Januarie vanjaar.

“Die polisie het na bewering in Januarie 2016 inligting opgevolg oor ʼn gekaapte Ford Figo wat in Soweto opgemerk is,” het Robbie Raburabu, woordvoerder van die Onafhanklike Polisieondersoekdirektoraat (Opod), gesê. “Die twee blitspatrolliebeamptes wat in hegtenis geneem is, voer aan die polisiebeampte is doodgeskiet toe hy hul pad versper het en hulle verhoed het om by die gekaapte motor uit te kom.”

Raburabu bevestig Opod ondersoek die moord en die lede, ʼn 49-jarige adjudant-offisier en 29-jarige konstabel, is Maandagoggend in hegtenis geneem en het in die Kliptown-landdroshof verskyn. “Hulle staan tereg op aanklag van moord en dwarsboming van die gereg.”

Hulle bly in aanhouding tot hulle Woensdag formeel kan aansoek doen om borgtog.