Bloemhof-betoging: Huise brand, polisiestasie beskadig

Argieffoto. Foto: ANA

Motoriste is gewaarsku om versigtig te wees indien hulle vandag op die N12 tussen Christiana en Bloemhof in Noordwes ry aangesien dié gebied sedert gister onder gewelddadige betogings gebuk gaan.

Drie polisiebeamptes se huise is deurwoedende betogers aan die brand gesteek en ʼn polisiebeampte is beseer nadat hy deur ʼn betoger met ʼn klip in die gesig gegooi is.

Kapt. Sam Tselanyane, woordvoerder van die polisie, sê die geweld het omstreeks 20:00 gisteraand begin toe ʼn groep inwoners van die Boitumelong-nedersetting na die polisiestasie opgeruk het om te eis dat vyf verdagtes wat op aanklag van aanranding in hegtenis geneem is, vrygelaat moet word.

“Die betogers het glo die polisiestasie met klippe bestook, maar het uiteindelik uitmekaar gegaan. ʼn Polisiebeampte het beserings aan sy gesig opgedoen toe hy met ʼn klip in die gesig getref is en daar is ook skade aan die polisiestasie aangerig,” sê Tselanyane.

Die betogers het egter nie die saak daar gelaat nie. Deur die loop van die nag is drie polisiebeamptes se huise aan die brand gesteek. “Een van die huise is heeltemal tot op die grond afgebrand. In die tweede huis is die meubels erg beskadig, terwyl slegs ʼn gordyn in die derde huis in die slag gebly het,” sê Tselanyane.

Vroeg vanoggend het die betogers weereens bymekaargekom, glo met die voorneme om die polisiestasie aan te val.

“Volgens die inligting wat tans tot ons beskikking is, het die betogers egter uitmekaar gegaan nadat die bevelvoerder van die Pudimoe-groepering hulle toegespreek het en ingestem het om later weer met hulle te vergader.”

Tselanyane sê hoewel die situasie in die gebied tans kalm is, monitor die polisie steeds die gebied en word ʼn hoë vlak van sigbare polisiëring gehandhaaf.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
James

Ja asb Monitor net. Dis wat my belasting voor betaal. Ek monitor nou hoe ek kan bespaar op belasting.

Wurmpie

Van wanneer af kan mense eis dat misdadigers losgelaat word en word dan self misdadigers

Frans

Goed gestel James, die polisie monitor alles, dit moet inspannend wees om soveel inligting en data te verwerk! Nou monitor hulle wanneer weer huise afgebrand word, sodat daar minstens ‘n moniterings verslag opgestel kan word, wat weer deur ander genonitor sal word. So word polisiëring tot “groot oë” moniterings aktiwiteite beperk, anders is dit te veeleisend. Ek is verstom hoeveel protesaksies elke dag gerapporteer word waar vandalisme, verhindering van publieke paaie se gebruik, geweld en vele meer met moniteringsbeleid beheer word. En ons belasting moet die skade en salarisse van moniteerders betaal. Dit kan ek nie verstaan nie, want protesaksies… Lees meer »

John

Iets wat mens nie klein kry nie, is dat die betogers hul eie taxigeld betaal om ver weg, hard te gaan werk deur gevaarlike klippe rond te dra en in die bloedige son te toi… sonder betaling. Maar gee hulle net werk om ‘n paar bokse te skuif teen goeie betaling en taxigeld en medies dan hoor jy hoe ongelukkig en moeg en verontreg hulle is.

PJC

Hierdie klomp weet baie goed dat die polisie nie streng teen hulle gaan optree nie want dit is nie in die ANC se beste belang so kort voor die verkiesing nie en dit is landwyd die geval.