Bloutrein ontspoor in Germiston

Die bekende Bloutrein het Sondag kort na middernag naby Germiston ontspoor. (Foto: Twitter)

ʼn Ondersoek sal van stapel gestuur word nadat een van Suid-Afrika se beroemde Bloutreine Sondag kort ná middernag by die Uniestasie in Germiston ontspoor het.

Sibu Majozi, uitvoerende bestuurder van Transnet Freight Rail (TFR), sê die trein met 19 leë waens het omstreeks 00:35 ontspoor.

“Dit was ʼn onbemande trein met geen passasiers aan boord nie. Geen beserings op die toneel is aangemeld nie,” sê Majozi.

Volgens Majozi sal ʼn ondersoek nou gedoen word na die oorsaak van die ontsporing en remediërende stappe sal gedoen word, indien nodig.

“Howel Bloutrein-dienste geraak word, sal daar geen kansellasies wees nie. Daar is ook geen uitwerking op Transnet-vragspoorvervoer se bedrywighede nie.”

Op sosialemediaplatforms het talle gebruikers op die voorval kommentaar gelewer en onder meer die skuld op onvoldoende instandhouding van die spoorlyn gepak.

Die Bloutrein vier vanjaar sy 75ste bestaansjaar en is wêreldwyd bekend. Dié superluukse trein reis tussen Pretoria en Kaapstad en bied ook toere na die Krugerwildtuin.

Buite seisoen sal ʼn kaartjie jou minstens R28 000 per persoon uit die sak jaag, terwyl pryse vir piektye op amper R36 000 per persoon staan. Die kaartjies sluit alle etes, drankies en uitstappies (behalwe Franse sjampanje, kaviaar en oproepe) in.

Transnet voer nou al jare lank ʼn opdraande stryd teen ʼn beduiende toename in kabeldiefstal en vandalisme van sy spoornetwerk. Boewe teiken veral treinkabels, wat noodsaaklik is vir die doeltreffende werking van die treine.

Majozi het onderneem om verdere inligting bekend te maak sodra dit beskikbaar is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

37 Kommentare

jongste oudste gewildste
VaalDonkie

Jammer dit was nie die soustrein nie

Maggies

Hoe ontspoor ‘n “onbemande” trein? Nou voel my brein baie dom.

Dries

Eenvoudig. Treinspoor diefstal is aan die orde van die dag. Skrootwerwe maak baie geld

Racheltjie Debeer

In die “ou” SA was daar Spoorweg polisie wat die spoorlyne gepatrolleer het en die stasies veilig gehou het. Nou is is daar niks. Die hele spoornetwerk gaan binnekort verdwyn weens misdaad en korrupsie.

marius

“Onbemande trein ” Was dit ‘n spook ?