Boer (82) sien nie kans vir plaas ná aanval

Jan Terburgh woon al 82 jaar op sy geboorteplaas, maar sien nie meer kans daarvoor ná die aanval nie. Foto: Verskaf

Waarskuwing: Hierdie berig bevat grafiese foto’s van die boer se beserings wat lesers kan ontstel.

Die bejaarde boer van die distrik Burgersdorp wat Maandag helderoordag wreed aangerand is, kan hom nie indink om ooit weer op sy geboorteplaas te woon nie.

Dokters kan nog nie sê hoe lank Jan Terburgh (82) in die waakeenheid van ʼn Bloemfonteinse hospitaal sal moet bly nie. Sy oë is só opgeswel, hy kan net deur ʼn skrefie uit die een oog sien. Sy gesig het gebrand en het veelvuldige beserings, en sy arms is opgeswel waar die aanvallers hom vasgebind het.

Pieter Koekemoer, wat soos ʼn seun is vir die kinderlose Terburgh en sy vrou, Alta, sê hy kan nie verstaan dat die polisie in aanvanklike berigte nie melding gemaak het van hoe ernstig sy beserings is nie.

Sy beserings is nie gering nie.

“Sy beserings is nie gering nie,” het hy Woensdagmiddag aan Maroela Media gesê. “Hy is nog gekoppel aan suurstofapparaat en vandag het hulle hom op ʼn gewone suurstofhulpmiddel gesit met ʼn klein pypie voor sy neus. Die feit dat hy nog in die waakeenheid is, is bewys van die skade wat aan hom gedoen is.”

Jan Terburgh is in die waakeenheid van ’n Bloemfonteinse hospitaal vandat hy Maandag aangeval is. Foto: Verskaf

Bewoners van die distrik het Maandagmiddag opgemerk hoe drie onbekende mans met Terburgh se bakkie rondry. Kort daarna is hy aangerand aangetref in die opstal op sy plaas, Alfalfa, sowat 30 km buite Molteno. Sy huishulp en drie werkers is in die badkamer van die huis vasgebind.

Terburgh is aangerand en in die gang vasgebind. Die aanvallers het die huis geplunder en verskeie items, insluitend ʼn vuurwapen en ammunisie, geroof. Hulle het daarna in Terburgh se wit Isuzu-bakkie op die vlug geslaan, het die polisie kort ná die aanval gesê.

Koekemoer vertel die aanvallers het ook ʼn handdoek oor Terburgh se kop gegooi en vuurwarm water daaroor uitgegiet. Nadat hulle hom gedwing het om die kluis oop te sluit, het hulle hom in die gesig en oor sy lyf geslaan.

Hulle het die ketel aangeskakel om water te kook en ʼn handdoek om sy kop gevou.

“Dit was ʼn bestiering,” vertel Koekemoer van die water, wat veronderstel was om kookwater te wees. “Hulle het die ketel aangeskakel om water te kook en ʼn handdoek om sy kop gevou, maar op daardie oomblik het die krag afgegaan.

Die beserings aan Terburgh se arms. Foto: Verskaf

“Hulle tap toe geruime tyd lank warm water uit die geiser om dit vuurwarm te kry en gooi dit op oom Jan se kop uit. Die geiser se temperatuur is op 80 °C gestel.”

Hulle weet nie hoe lank hy in die waakeenheid sal moet bly nie, sê Koekemoer. “Vandag en môre sal kritiek wees. Die skok is vir hom baie groot, want hy is 82 jaar oud.”

Hy dink nie hy sal ooit weer in daai huis gaan slaap nie.

Terburgh se vrou gaan tuis in ʼn gastehuis in Bloemfontein sodat sy naby haar man kan wees, maar Koekemoer sê Terburgh “kan nie dink dat hy ooit weer in daai huis sal gaan slaap nie. Hy sien nie kans om weer op die plaas te bly nie.”

Daarom beplan die egpaar om met hul terugkeer na Burgersdorp in die Dirk Postma-tehuis vir bejaardes te gaan woon, al was die plaas drie geslagte lank in die Terburgh-familie en woon die 82-jarige al sy lewe lank daar.

Die polisie het twee verdagtes kort ná die aanval in hegtenis geneem, van wie een in ʼn skietery met beamptes gewond is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

82 Kommentare

jongste oudste gewildste
hendrik

skokkend, skokkend. Die buiteland moet dit sien en stuur sommer n paar van die fotos vir die’ land se liegende president.

Genieve

Ek weet nie meer wat om te se nie dis verskriklik regtig. Oom moet gou gesond word.

Wat Nou Waar Nou

Mense ek dink die tyd het nou *aangebreek*

Jammer

My Liewe Oom. Ek is so jammer oor wat met Oom gebeur het. Mag Liewe Jesus Oom sommer baie gou gesond maak. Baie sterkte.

Liza

Ai dis vreeslik wreed wat hulle aan die oom gedoen het… Here bewaar die oom asb.