Só lyk ‘n Google Loon-ballon. Foto: Google Loon/Facebook
ʼn Boer van die Karoo het op ʼn ballon afgekom wat glo deur die internetmaatskappy Google gebruik word, het Beeld Donderdag berig.
Urbanus Botha, wat nie baie tyd voor die rekenaar deurbring nie, het eers gedink dis dalk ʼn weerballon van De Aar maar kon nie deurkom toe hy die weerkantoor probeer bel het nie. “Die enorme stuk plastiek het my hele skaapsleepwa vol gelê,” het Botha aan die koerant gesê.
Botha het sy buurman, Stoffel Visagie, gekontak, aangesien laasgenoemde daarvan hou om nuwe dinge uit ou onderdele te skep. Visagie se dogter, Sarita (20), het die onderdele bekyk en foto’s vir haar ouer broers, Johan en Bennie, gestuur.
Hulle het die woorde “Google [X]” daarop opgemerk en dit ge-Google. Hulle het vasgestel dat die ballon en ander onderdele deel is van ʼn projek deur Google om permanente internettoegang te verskaf. Dit is glo ʼn semi-geheime toetsprojek genaamd Google Loon.
“’n Ingenieur in Kalifornië het per e-pos gesê die onderdele in my foto’s lyk soos dié wat hulle in die stelsel gebruik. Hy gaan ʼn plaaslike span stuur om die onderdele by ons te kry,” het Sarita aan die koerant gesê.
Botha boer tussen Strydenburg en Britstown.
Wel as jy kon google waaroor google [X] / Loon gaan, was dit gepubliseer, dus kan dit nie eintlik as n “semi geheim ” gesien word nie, want dit is beskikbare inligting…..{ net maar my beskeie mening }
Optelgoed is hougoed.