Boer voor vrou, ma afgemaai

BC en Marlette Greyling. Foto: Verskaf

Daar was eers ʼn harde slag en toe storm drie mans in donker klere skielik die Greyling-egpaar se plaashuis binne en skiet die man trompop voor sy vrou en bejaarde ma dood, sonder om ʼn woord te sê.

Alhoewel die vrou, Marlette Greyling (57), haar eggenoot, BC (59), in dié aanval Dinsdagaand op hul plaas buite Sannieshof in Noordwes verloor het en self ook geskiet is, was haar woorde aan haar beste vriendin dat die voorval nie die gemeenskap moet ontstoke maak en tot haat en wraak moet lei nie.

Marlette se vriendin, Carin Visser, is self ʼn prominente figuur in die hegte gemeenskap waar sy die DA-raadslid is, asook die party se voorsitter in provinsie. Sy was een van die eerste mense wat van die aanval op haar vriende, vir wie sy al 35 jaar lank ken, te hore gekom het.

Volgens Visser het Marlette, BC en BC se ma, Magdaleen Greyling (87), omstreeks 19:30 aan tafel gesit en aandete eet terwyl hulle nuus gekyk het.

“Die weer was skaars klaar en hulle het daaroor gepraat toe hulle skielik ʼn groot slag vanuit een van die kamers hoor. Daar is later vasgestel die aanvallers het met ʼn bakkie daar opgedaag en die groot vensters in die kamer gebreek om toegang tot die huis te kry,” het Visser Woensdag aan Maroela Media gesê.

“BC het gaan ondersoek instel en was skaars in die portaal toe ʼn gewapende man hom nader en van ʼn kort afstand in die bors skiet, sonder om ʼn woord te sê. BC het dadelik op die grond neergeval. Marlette kan onthou sy het drie mans gesien. Hulle het donker klere, tekkies en klapmusse aangehad. Dit is nie duidelik of daar nog mense buite die huis gewaak het nie. Sy onthou ook een van die mans het ʼn groot sny aan sy arm opgedoen waar die venster hom vermoedelik gesny het.”

Die aanvallers het Marlette beetgekry, aangerand en aangedring op geld en die kluis se sleutels. Sy het verduidelik dat daar nie geld in die huis was nie en is in die proses ook in haar regterblad geskiet. Die koeël is by haar linkerbobuik uit en het een van haar longe skrams gemis.

“Sy moes verby BC se liggaam loop om die kluis te gaan uitwys. Intussen het tannie Magdaleen uit die vertrek gevlug en in die sitkamer onder ʼn tafel gaan wegkruip. Die verdagtes het omtrent ná ʼn halfuur in hul en Marlette se bakkie met vuurwapens en drie selfone gevlug. Gelukkig het Marlette ʼn ekstra selfoon in huis gehad wat op ‘n ander plek was waarmee sy hulp ontbied het toe hulle weg is.”

Die veiligheidstrukture is in werking gesit en ʼn veiligheidsmaatskappy was binne tien minute op die toneel. BC is op die toneel dood verklaar en Marlette is met ʼn ambulans na ʼn hospitaal geneem. Magdaleen is erg getraumatiseerd, maar ongedeerd.

Marius Müller, nasionale veiligheidskoördineerder van AfriForum, het aan Maroela Media gesê plaaswagte, buurtwagte en boere van Ventersdorp, Klerksdorp, Coligny en Lichtenburg het na die gebied gehaas en paaie afgesper in ʼn poging om die aanvallers vas te trek. Een van die bakkies is omstreeks middernag in ʼn nedersetting buite Ottosdal opgespoor, maar teen Woensdagoggend was die verdagtes steeds soek.

Volgens Visser moes die verdagtes goed vertroud gewees het met die omgewing, want hulle het van binnepaadjies gebruik gemaak om die boere te ontduik.

Visser het gesê sy het met Marlette op haar selfoon gepraat terwyl sy in die ambulans op pad was hospitaal toe. “Sy het my alles vertel wat gebeur het en hoewel sy ook erg getraumatiseerd was, was haar grootste pleidooi en versoek dat die gemeenskap nie in woede moet optree of wraak moet neem nie. BC sou dit ook nie wou gehad het nie.”

Visser verduidelik dié woorde dui op die aard van die egpaar se karakter. “Hulle is albei baie geliefd in die omgewing waar hulle al nagenoeg 36 jaar woon. BC was ʼn aktiewe boer en boer met skape, beeste en saailinge. Marlette is ’n boekhouer en doen meeste van die boere se boeke. BC was ʼn baie rustige en kalm mens en het nog nooit harde woorde of iets slegs teenoor enigeen gesê nie. Hy was ʼn man van statuur en ʼn baie goeie man, pa en oupa.”

Marlette se toestand is stabiel en sy sterk in die waakeenheid van die hospitaal aan. “In dié stadium is die trauma en verlies vir haar die ergste, maar sy word deur vriende en familie bygestaan.”

Die egpaar het drie seuns, Gerhard, hul oudste, Marius en Christo, hul jongste. Gerhard en Marius woon in Kanada en land na verwagting Donderdagaand in Suid-Afrika om hul ma by te staan. Christo woon op ʼn plaas naby sy ouers. Hulle het ook drie kleinkinders.

“Marius-hulle het onlangs ʼn dogtertjie gekry en Marlette en BC sou nog eersdaags Kanada toe vlieg om hul kleinding te gaan sien. Nou gaan die gesin mekaar onder sulke tragiese omstandighede sien,” het Visser bygevoeg.

Visser vertel die omgewing se boere is ook erg getraumatiseerd. “Ons herstel nou eers van die afgelope tyd se droogte en die gemeenskap is tot op die been oopgesny. Daar is eenvoudig net nie geld om duisende rande aan sekuriteitsopgraderings te bestee nie. Dit laat die groot vraag – wat was die rede agter die aanval? Die aanvallers het geweet wat hulle doen en moes ook weet daar is nie geld nie. Die boere hou nie geld in die huis aan nie, want daar is nie geld nie. Al wat hulle kon weet daar was, is wapens en bakkies.”

Sers. Kelebogile Moleko, woordvoerder van die polisie, het aan Maroela Media gesê die polisie is op soek na drie verdagtes in verband met dié voorval. Die polisie ondersoek ʼn saak van moord en huisroof.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
schalk

Martin, . Gee jou kommentaar. Boere, bewapen julself. Jou wapen moet jy rond drae soos jou selfoon. Moenie wag dat hy eerste skiet! Jy kry dalknie n kans nie!!!

Hettie

Baie sad. Sterkte aan julle almal. Julle is in ons gebede

Susan

Maar net nog ñ moord op Boer wat die land voorsien met voedsel onder die mat gevee..Ons innige simpatie aan die familie en gesin! Ons huil saam!…

Ai

Verkoop die plaas en gaan Kanada toe. Ons in die Stede is magteloos en kan julle Boere nie help nie behalwe om julle in ons gebede te hou. Die van julle wat dit kan bekostig moet eerder gaan want ek kan sien dit is presies die boodskap wat hier deur die regering gegee word- Boere is nie meer welkom nie. Ons Boere word vermoor en hulle vee word wreed afgeslag. Die regering is tjoepstil. Die res van die wereld voel n veer vir die Afrikaner want die propaganda het sy werk goed gedoen.

Dit breuk mens.

Elsa

Waar is die lriers van die land wat moet optree teen die boewe? ontwaak en maak julle oe oop…dis n skreinde skande…grnoeg is niu genoeg :”demit”