Boerboel jaag inbreker die swembad in

Jess, die boerboel (Foto verskaf aan Maroela Media)

ʼn Vermeende inbreker het Sondagaand sy moses teëgekom toe ʼn boerboel hom skielik aan die anderkant van ʼn heining ingewag het.

Jody Gabrielsen van Ifafi in Hartbeespoort, Noordwes, het aan Maroela Media gesê ʼn inbreker het Sondagaand omstreeks middernag oor sy heining geklim. “Die heining is ongeveer 2.4 meter hoog en daar is ook penne bo-op. Die inbreker moes met die oorklimmery die klokkie getref het, en Jess het dadelik reageer.”

Jess is die gesin se agtjarige boerboel.

Jody was nog besig om televisie te kyk en het gaan ondersoek instel waarom die hond so tekere gaan buite. Die inbreker het in daardie stadium die yskoue swembad aangedurf om van Jess weg te kom en die boerboel het op die rand bly staan. “Sy het begin bedaar toe ek buite kom, en toe ek haar roep, het die man besluit om sy kans te waag en te vlug. Hy wou oor die bure se heining klim, maar my buurman het ʼn paar pitbulls, so hy het sommer dadelik omgedraai. Hy het waarskynlik gedink ek en Jess is die beter opsie.”

Jody verduidelik hy kon die man voorkeer terwyl sy vrou die polisie, buurtwag en PWV Security gekontak het. Clive Fisher van die sekuriteitsmaatskappy het sommer vinnig opgedaag met die buurtwag kort op sy hakke en die man is in hegtenis geneem.

Die verdagte word aangekla van oortreding en die besit van inbraaktoerusting.

Jess is al van ʼn babahondjie deel van die gesin en het saam met Jody se seun grootgeword. “Sy is die dogter in ons gesin!” het Jody geskerts.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Anoniem

Puik gedaan Jess gee haar n rump steak sy verdien dit

Honde

As jy nie in n veilige veiligheidsoord bly nie, skaf baie kwaai honde aan, dit werk

Johann

Whahahahaaaaa…. lekker kry ek nou.

Carel Wilken

Vrede met rumpsteak! ‘n Hele biltong en ‘n skaapboudbeen sal meer gepas wees

Natan

Jess vir minister van polisie.