Boere dreig met hofstappe oor veilingverbod

(Argieffoto)

ʼn Groep boere en ander betrokkenes in Noordwes dreig om die minister van landbou, Thoko Didiza, hof toe te sleep nadat ʼn verbod verlede week op veilings in verskeie provinsies geplaas is.

Dít nadat bek-en-klouseer wéér in die provinsie uitgebreek het. Die uitbreking is dié keer in die Molemole-distrik. Alle produksiefasiliteite, voerkrale en slagpale in die Molemole-distrik en omliggende gebiede word gemonitor.

Die streek is digby die Vhembe-gebied waar bek-en-klouseer in Januarie vanjaar uitgebreek het. Die departement het vroeër gesê daar kon dus vinnig op die uitbreking gereageer word en alle vorige beheermaatreëls vir die provinsie bly steeds van krag.

Andreas Peens, die groep se regsverteenwoordiger, het gesê die minister het tot Dinsdag om 12:00 om op die skrywe te reageer.

Die verbod is op 14 November geplaas op veilings in Limpopo, Mpumalanga, Gauteng en Noordwes en is boonop onbepaald gedoen. Die departement het ook onder meer beveel dat diere onder veearts-toesig vervoer moet word en dat enige verskuiwings tot die minimum beperk word.

“Dis bitter onregverdig. Hulle het die veilingshuise toegemaak, maar nie ʼn verbod op die vervoer van diere geplaas nie,” het Peens gesê.

Dit beteken in praktyk ʼn boer in ʼn provinsie waar veilings opgeskort is, kan bloot sy diere na ʼn provinsie vervoer waar die verbod nié geld nie.

(Argieffoto: Hartebeestloop)

Peens het gesê behalwe vir die feit dat daar geen einddatum vir die verbod bekend gemaak is nie, geld dit omtrent vir die helfte van die land. “Dit is heeltemal onbillik. Hulle kan onmoontlik so ʼn groot gebied doeltreffend monitor.”

In hulle brief sê die groep hoewel die departement reeds op 1 November bewus geword het van die uitbreking, is daar bykans twee weke lank geen stappe gedoen nie. Die situasie is volgens hulle ook nie met rolspelers in die bedryf bespreek nie, ten spyte van die “verreikende gevolge” wat dit inhou.

“Die besluit beteken dat die hele veilingbedryf [van geraakte diere] tot stilstand gaan kom. Dit gaan lei tot die sluit van veilingshuise, enorme werksverliese en vooroordeel aan ander in die bedryf.”

Hulle sê voorts die besluit plaas verdere druk op boere wat betref hul kontantvloei, met die feestyd en plantseisoen op hande en beskou die besluit boonop as onwettig. “Die maatreëls wat ingestel is om die siekte te beheer is uiters hardvogtig, te drasties, buite proporsie tot die risiko en nie in ooreenstemming met ʼn soortgelyke besluit wat in Januarie 2019 geneem is nie.”

Volgens die departement sou die besluit in die Staatskoerant afgekondig word, maar dit is oënskynlik ook nog nie gedoen nie.

Hulle vra dus die minister om te bevestig dat sy wél die verbod ingestel het, op watter gebiede dit van toepassing is, óf – en indien wél, wanneer – die besluit in die Staatskoerant afgekondig is en hoekom die besluit geneem is. Hulle wil ook weet wanneer die besluit opgehef gaan word.

Peens het gesê as die minister wél reageer, maar hulle nie tevrede met haar reaksie is nie, gaan hulle oorweeg om die hooggeregshof nader en vir ʼn dringende bevel vra om die verbod te laat opskort.

Dit blyk intussen dat die bedryf, ten spyte van die verbod, met veilings voortgaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

Het jy iets op die hart? Maroela Media se kommentaarfunksie word ongelukkig tydelik gesluit tussen 19:30 en 06:00.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.

15 Kommentare

Ellisras ·

Met die droogte het ons boere beeste terug gehou. Noudat dit gereën het styg pryse. En ons kan nie ‘n bees bemark nie. Ek kan nie Des salarisse betaal as ek nie beeste verkoop nie.

jennefer ·

Glad nie, net nog n strategie wat boere se lewe en vooruitgang in die weegskaal plaas. As ek more kan gaan verkoop in die Kaap ,gaan daar volgende maand n verbod wees op veilings landwyd.

TDW ·

Jennefer jy is heeltemal reg. Ons boere word uitgeroei vir ‘n rede. My vraag is: Is daar werklik ‘n uitbreking van bek-en-klouseer? Indien wel, waar kom dit vandaan? Wat ek wel weet is dat ek glad nie enige woord kan glo wat die regering kwytraak nie. Die regering het nie die beswil van die land in gedagte nie. Hul agendas is vir eie doel.

marous ·

Hulle het die klok hoor lui maar dink dit is ‘n roomys kar …

Pieter ·

Wanneer gaan ons blankes ooit stanpunt in neem die ANC mors met ons en dan se ons nog dankie ook

Pampoen ·

Ek is ‘n leek as dit by beeste, bek-en-klouseer en veilings kom. Dit sou vir ons baie werd wees as die mense wat kla vir ons ook alternatiewe voorstel om die siekte te bekamp.

Karlahari ·

In die goeie ou dae het die regering verpligte dip en dosering sessies gehad waar alle klein boere hulle vee moes dip.
Beeste ens is nie toegelaat in dorps gebiede nie. Geen vee mag oor die grens gekom het sonder kwarantyn ens.
Dit is hoe dit voorheen beheer was en toe Onderstepoort nog n leier was op navorsing oor vee siektes en produksie van entstowwe.

jennefer ·

Daar is n alternatiewe voorstel, die labaratorium is nog nie klaar gebou maar die geld is klaar.

Pieter ·

Toe was ons grense nog veilig die weermag en komando het seker gemaak die ander klomp konnie kom en gaan soos hulle wil nie hulle vee kon ook nie oor kom na ons kant toe nie nou kan jy en jou diere kom en gaan soos jy wil dan kom gebruik jy sommer ons dokters en hospitaale ook als is verniet dit is hoe ons belasting geld gemors word want as die verkiesing kom dan kom baie van die buurlande se mense oor hier na ons toe dan kom stem hulle vir die ANC en in ruil daar voor help die ANC hulle die kant

Judge Dredd ·

As verbod nie in staatskoerant geplaas is – gaan voort soos altyd.

Scalla ·

Gaan bepaal jul eerder by die rondloper beeste rondom plakkerskampe wat van plastieksakke lewe en nooit gedoseer of ge ent word nie, dit is deel van die probleem. Die ligte is aan maar daar is niemand tuis nie.

francois ·

Dit blyk dat die meeste kommentators sou verkies dat ‘n hoogs aansteeklike dieresiekte, wat geweldige implikasies vir uitvoere van ‘n wye reeks dierlike produkte het (o.a. vleis, melk, wol en velle), gemaklik deur die land versprei. Veilings is ‘n bymekaar kom plek vir verskeie diere wat die verspreiding van die siekte verhoog selfs na die onskuldige boere wat gesonde diere daar het of vermoedelik gesonde diere aankoop en na sy/haar plaas vervoer en die ander diere aansteek.

Die vervoer van diere onder veearts-toesig behels dat die staatsveearts ‘n permit moet uitreik waarin hy/sy aandui dat volgens sy/haar wete die diere nie besmet is nie en die permit dui aan waar die diere vertrek en waar hulle afgelaai word. Die voertuig worg geseël en die seël mag eers by die bestemming gebreek word. Dit is dus nie bloot ‘n geval van “laai en laat waai” nie.

Die sou ook goed wees om te let dat die huidige Dieregesondheids wet van 2002 en die beheermatreëls daarin vervat, grootliks gebaseer is op die Wet op Dieresiektes van 1984 en veral die beheermatreëls presies dieselfde is as wat in die 1984 wet vervat is. Dus is die regte wat aan die Departement toegeken is onder die wet om beheermatreëls in plek te stel, wat insluit die vervoer van diere onder ‘n permit, nie iets waarmee die huidige regering vorendag gekom het nie en dieselfde beheer is voor 1994 ook uitgeoefen.

Het jy iets op die hart? Maroela Media se kommentaarfunksie word ongelukkig tydelik gesluit tussen 19:30 en 06:00.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.