Boere gewaarsku teen EFF, ‘arbeidsinspekteurs’ wat plase betree

(Foto: EFF/ Twitter)

Boere word gewaarsku teen lede van die EFF en sogenaamde arbeidsinspekteurs wat plase betree en amok wil saai met die doel om na bewering meer stemme te verwerf.

TLU SA sê hy het verneem van verskeie voorvalle waar lede van die EFF se sogenaamde “labour desks” en mense wat hulself as arbeidsinspekteurs voorgedoen het só toegang tot plase en plaaswerkers gekry het.

Drickus Botha, streeksbestuurder van TLU SA se Noordstreek, sê die EFF maak verskillende dreigemente gevolg deur protesoptogte waarin memorandums van eise aan plaaseienaars oorhandig word. “Dié eise is meestal onredelik, ongegrond en met geen wetgewing wat dit ondersteun nie. Die boere word dan gedreig om aan die eise te voldoen of ʼn tweede besoek van die party te wagte te wees.”

Daar was glo al voorvalle in Groblersdal, Tolwe en Naboomspruit in Limpopo waar aanranding plaasgevind en werkers uiteindelik ontslaan is.

“Ons ervaar dat werkers tot so ’n mate mislei word dat hulle nie meer ware arbeidkwessies na die Kommissie vir Versoening, Bemiddeling en Arbitrasie (KVBA) of aangewese departemente verwys nie, maar slegs na die EFF luister.

“Die EFF kan nie veel meer doen as om beloftes te maak oor wat tydens die verkiesing gaan gebeur nie.”

TLU SA doen nou ’n beroep op boere om paraat te wees en beveel aan dat plaaseienaars die volgende stappe neem om hulleself te beskerm: Hou hekke gesluit en maak seker daar is ʼn bord waarop duidelik aangedui word dat die grond privaat is en oortreders vervolg sal word – die bord moet in meer as een taal wees; sluit by ʼn plaaslike veiligheidstruktuur aan; kry ’n gebeurlikheidsplan gereed; steun op ervare onderhandelaars om met betreders te praat; beplan saam met die plaaslike polisie hoe en wanneer om op te tree en steek kers op by kundiges oor wette met betrekking tot openbare byeenkomste en betreding. Geen personeelrekords mag sonder ʼn lasbrief of aan enigiemand sonder die nodige identifikasie gewys word nie.

Die South African Parastatal and Institutions Union (Saptu) veroordeel intussen die optrede van diegene wat agter hierdie sogenaamde “labour desks” skuil in ’n poging om meer stemme in die komende verkiesing te verwerf.

“Politieke partye kan nie deur middel van die Grondwet bevoegdhede verkry om by die werkplek in te meng nie aangesien dit nie deel vorm van die amptelike strukture van arbeid nie en hulle nie die pligte nakom wat deur die Wet op Arbeidsverhoudinge aan vakbonde voorgeskryf word nie. Die EFF maak baie geraas, maar hulle het geen mag in hierdie verband nie,” sê adv. Ben van der Walt, hoofsekretaris van Saptu.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Misky

Hierdie ouens hou eenvoudig net nie op nie!!!! Saai amok en krap waar dit nie jeuk nie. Kla die party aan van terrorisme en kry klaar!!!!

Persheks Adri

Ag genade wanneer word hulle toe gesluit vir al hulle wangedrag, haatspraak en aanhitsing van geweld? Ek is só moeg vir hulle pffft die hele lot van hulle!

Genis

Dis mos krimineel om jouself voor te gee? Le klagtes by die polisie, of mis ek iets.. Dis tyd ons vastrap hulle goed op hul neuse laat dyk…

Debbie

Hulle moet altyd hul neus insteek waar dit nie hoort nie. Sodra dinge begin rustig raak dan doen die EFF iets wat net probleme veroorsaak. Malema hou van aandag op hom, wil net op die tv wees al die tyd maak nie saak wat dit ander mense kos om daar te kom nie

Adam Adriaan

Op my plaashek en lyn drade is daar kennisgeings wat lui ” Illegal trespasser will be shot on sight”