‘Boere moet weier om grond af te staan’

Argieffoto: Reint Dykema

“Boere wie se grond geteiken word vir onteiening, hetsy sonder vergoeding óf teen ʼn simboliese vergoeding wat laer as markwaarde is, moet weier om hul grond af te staan, want dit is niks anders as diefstal nie.”

Dít was die oproep vandeesweek by TLU SA se Noordstreek se algemene raadsvergadering.

Henk van de Graaf, voorsitter van TLU SA Noord, het in ʼn verklaring gesê boere was tydens die vergadering eenparig in hul besluit om enige moontlike onteiening met alle moontlike mag teen te staan, omdat nie hulle óf hul voorouers enige grond gesteel of andersins onregmatig bekom het nie.

De Graaf sê dié sterk standpunt is ingeneem nog voor AfriForum vroeër vandag bekendgemaak het dat hy ʼn lys bekom het wat na bewering ʼn interne dokument van die departement van landelike ontwikkeling en grondhervorming is waarop plase, kleinhoewes en erwe gelys word wat glo geoormerk is om sonder vergoeding onteien te word.

“Boere sien dit as kwaadwillig en ʼn oorlogsverklaring, en die regering moet besef dat hy met vuur speel en afstuur op ʼn uiters plofbare situasie wat tot niemand se voordeel gaan wees nie,” sê De Graaf.

“Die situasie vereis groter samehorigheid oor die beginsel teen onteiening. Al sou net een plaas onteien word en die landbougemeenskap laat dit toe, sal dit slegs die eerste domino wees wat ʼn proses tot gevolg gaan hê. Daarom moet gemeenskappe hulself organiseer en by georganiseerde landboustrukture inskakel sodat ʼn deeglike plan van optrede uitgewerk kan word vir ingeval so iets sou voorkom.”

De Graaf het daarop gewys dat plaasbesettings, wat reeds voorkom, onmiddellike optrede vereis. “Waar daar egter onteiening plaasvind, sal dit deur ʼn sogenaamde wettige proses geskied waar amptelike onteieningsdokumente op die eienaar bedien sal word. Ons erken geen diefstal van enige aard nie, hetsy dit met óf sonder papiere sou geskied, en ons oorweeg alle opsies. Intussen is dit belangrik dat boere sterk standpunt moet inneem en daarby staan,” sê hy.

“TLU SA Noord gaan begin om ʼn dispuut met die regering te verklaar oor die onteiening van enige grond in die Limpopo-provinsie, asook om ʼn dispuut te verklaar oor die wettigheid van ʼn wysiging van die Grondwet om diefstal te regverdig. Ons vra dat alle grondeienaars die dispuut ondersteun by wyse van die ondertekening daarvan.”

Hy het ʼn beroep op die publiek gedoen om TLU SA by te staan met bydraes en donasies om die organisasie se regsfonds te versterk vir moontlike regsgedinge in die toekoms. “Ons doen ook ʼn beroep op goedgesinde regslui, wat dalk self grond besit, om na vore te kom en hulp aan te bied met regshulp op ʼn meer bekostigbare basis.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

124 Kommentare

jongste oudste gewildste
Solopsisiphus

Sal Maroela Media asb die TLU SA regsfonds se bankbesonderhede publiseer sodat ons kan donasies maak?

Johann M van Heerden

Die voorgestelde grond onteiening is ‘n oorlogverklaring. As die eerste privaat grond ontein word moet almal saamstaan en weier om dit toe te laat. Ons moet eenvoudig weier om verder belasting op eiendom, ens te betaal. Ons moet ook op groot skaal weier om verbande te diens. Ons moet saam die fondse in rekening betaal wat vir alternatiewe belasting aan ‘n alternatiewe of virtuele regeringkan dien. Ons moet radikaal begin dink en saamstaan. As enkellinge is ons gedoem. Dit is natuurlik ons grootste probleem. Naamlik dat ons nie kan saamstaan nie.

Pieter

Roep Donald Trump en die V.N. in op die storie en dra jou wapen by jou , dag en nag .

Abraham

Boere sal moet saamstaan en hulle grond beskerm

Apie

Druk asb op my nommer waar geveg gaan word. Ek het nie grond, maar sal ons boere help teen hierdie diewe!!