Boeremag: Pa en seuns nader grondwethof

Dr. Lets Pretorius en twee van sy seuns, drs. Johan en Wilhelm Pretorius, tydens ‘n familiedag by die Zonderwater-gevangenis. Foto: Verskaf

Drie van die sogenaamde Boeremag-gevangenes, ’n pa en sy twee seuns, het hulle direk tot die konstitusionele hof gewend.

Dr. Lets Pretorius en twee van sy seuns, drs. Johan en Wilhelm Pretorius, het ’n petisie aan hoofregter Mogoeng Mogoeng gerig. Volgens Riëtte van Schalkwyk, ’n woordvoerder van Boervin, ’n organisasie wat hom beywer vir die vrylating van “die Boerevolk se politieke gevangenes”, voer hulle in die petisie aan hoe die sisteem hulle reg tot appèl effektief ontneem.

“Dit sluit in hul aanhoudingsomstandighede wat deur die departement van korrektiewe dienste veroorsaak word, die vertragings en sloerings as gevolg van die wanadministrasie van die regshulpraad en die howe sélf wat daartoe bydra om die proses onregverdig en onwettig te maak.”

Volgens Van Schalkwyk versoek hulle dat Mogoeng ’n bevel moet maak dat prof. Hercules Booysen as hul advokaat en Julian Knight as hul prokureur deur die regshulpraad as hul regsverteenwoordigers aangestel moet word ten einde die grondwetlikheid van hul aanhouding aan te veg. “Hulle voer aan dat hulle die grondwetlike reg het om te appelleer en dat hulle die reg het dat die juridiese proses begin en afgehandel word sonder onredelike en onregverdige vertragings.”

Van Schalkwyk het gesê die petisie is reeds in Mei gerig en dat daar steeds op ’n antwoord gewag word. Johan en Wilhelm se aansoek om verlof om teen hul skuldigbevinding en vonnis te appelleer is in September verlede jaar in die hooggeregshof in Pretoria van die hand gewys.

Die pa en seuns is in 2012 saam met 17 ander mans in die hooggeregshof in Pretoria aan hoogverraad skuldig bevind. Die groep wou glo die ANC-regering in die vroeë jare 2000 omverwerp. Ná ’n verhoor van nagenoeg 10 jaar is die beskuldigdes tot effektief tussen vyf en 25 jaar tronkstraf gevonnis.

“Die Boeremag-lede bevind hulself die afgelope sowat vier jaar sedert vonnisoplegging, in ’n sisteem wat hulle effektief van hul grondwetlike reg op appèl ontneem,” het Van Schalkwyk gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

52 Kommentare

jongste oudste gewildste
SJ

Ja, en hoeveel van ons belasting geld wil julle nog mors met regsaksies? Al wat die klomp vêr-regses goed doen is om heeltyd gevang te word. Dis nogal komies, hulle wil jou konstant vertel hoe sleg die regering is en tog word hul telkens deur die einste regering gevang en toegesluit!

Johan. H.

Vandag lyk die prentjie bietjie anders. Laat die mene onmidelik vry,, Sit eerder die die hele kabinet in hul plek in die gevangenis,,, Want hulle pleeg hoogveraad teen die landsburgers met hul gesteley,,,

KAREN

Hoog tyd dat daar nou asb iets sal gebeur. Hartseerste is die verraad van die sekere manne in blou maar dan wat verwag mens van verraaier joiner blou baadjies. Sterkte aan die mans mag die Here julle genadig wees en die tronkdeure opswaai. Die spul is skynbaar baie bang vir julle aangesien hulle nie eens wou he die jong man moet sy grade plegtigheid bywoon !

jaco

So n groepie van NET 20 mans wou SA se regering omver werp? Het ek reg gelees? Ek sien al 3 het doktersgrade. Ek wonder waarin? wonder waarin? Dalk in die maak van absurde planne wat glad nie uitvoerbaar is nie?

Elsabe Otto

Ek hou hiervan! Ek knoop al my duime en bid saam!