Boervrou dood aanvaller met sy eie knopkierie

(Argieffoto)

’n Vermeende plaasaanvaller is dood nadat ’n Vrystaatse boer se vrou hom Maandag uit noodweer met sy eie knopkierie bygedam het in ’n poging om haar man se lewe te red.

Brig. Motantsi Makhele, polisiewoordvoerder, sê die egpaar het omstreeks 18:30 op hul plaas Weltevreden in die omgewing van Sasolburg aangekom en die plaashuis deur die motorhuis se deur binnegegaan.

Die boer se vrou het glo slegs een van hul skaaphonde in sy hok gekry en wou weet waar die ander is. Sy het om die huis geloop tot waar sy een van die honde dood aan die agterkant van die huis aangetref het. Volgens Makhele het sy haar man toe hoor skree.

Toe die vrou ondersoek instel, sien sy hoe haar man op die grond lê en met ’n knopkierie aangeval word. Die aanvaller, wat glo self op die plaas woon, het bo-op haar man gesit terwyl hy hom aangeval het.

Tydens die struweling het die knopkierie uit die aanvaller se hand geval. Die boer se vrou het dit opgetel en die aanvaller daarmee bygedam in ’n poging om die aanvaller van haar man af te kry.

Die aanvaller is in die proses noodlottig beseer. Die boer is ná die aanval na ’n hospitaal geneem vir mediese behandeling.

Makhele sê die aanvaller is met die polisie se aankoms dood op die toneel gevind. Die bebloede knopkierie, ’n bebloede graaf en ’n tuisgemaakte mes is ook op die toneel gevind. Dié mes is langs die oorledene gevind.

Die hond is vermoedelik met ’n skerp voorwerp doodgesteek.

Die omstandighede rakende die voorval word nou ondersoek, sê Makhele.

’n Saak van moord en poging tot moord word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

64 Kommentare

jongste oudste gewildste
miavos

Duidelik het dié boervrou bomenslike krag van Bo gekry.

Thelsa

Vatso ! Mooi gedoen Tannie

Willem Wikkelspies

Hou ons asb op hoogte! Sal graag wil weet wat die uitslag is van die aanklag van moord en poging tot moord ..

Swerwer

Tannie jy is dapper en ‘n heldin. Dit is vreeslik om te dink dat mense wat jy vertrou jou
aanval/beroof en probeer vermoor. Ek bid en glo dat die Oom ten volle sal herstel.

Pierre

en nou sal hulle sekerlik gearesteer word.