Boikot van Vodacom beplan oor ‘Please Call Me’-man

Panyaza Lesufi. Foto: Twitter

Die sogenaamde #PleaseCallMe-beweging dreig om Donderdag op te ruk na Vodacom se hoofkantoor in Midrand.

Die beweging is begin in ondersteuning van Nkosana Makate, die sogenaamde skepper van Vodacom se Please Call Me-diens. Makate en Vodacom is al jare lank in ʼn twis oor krediet vir die diens.

Panyaza Lesufi, LUR vir onderwys in Gauteng, is in sy persoonlike hoedanigheid deel van die beweging. Lesufi het ʼn prokureursbrief wat Vodacom aan hom gestuur het op Twitter gedeel. In die brief word Lesufi versoek om nie valse en lasterlike uitlatings te maak rakende Vodacom nie, asook nie mense aan te moedig om deel te wees van protesoptrede teen die selfoondiensverskaffer nie.

Vodacom het Lesufi gewaarsku dat strafregtelike vervolging hom in die gesig staar, sou dit plaasvind. Lesufi het egter in reaksie gesê hy sal nie geïntimideer of stilgemaak word nie.

Intussen word berig dat Vodacom gereed is om Makate te betaal vir die Please Call Me-diens. Volgens berigte het Vodacom glo vir Makate R49 miljoen aangebied. Makate het egter vroeër vandeesmaand gesê dat hy nog niks met Vodacom ooreengekom het nie.

Nkosana Makate. Foto: Facebook

“Die bedrag waarop die uitvoerende hoof besluit het, is skokkend en ʼn belediging. Ek word tans deur my regspan van raad bedien oor die regsmiddele tot my beskikking. Vodacom het nog nie om verskoning gevra vir sy veragtelike gedrag die afgelope 18 jaar soos bevind deur die konstitusionele hof nie,” het Makate gesê.

Vodacom het verlede jaar ʼn aansoek in die Pretoriase hooggeregshof ingedien om Makate te verhoed om inligting oor hul vergoedingsonderhandelings te verklap. Makate het daarna ʼn ooreenkoms met die telekommunikasiereus aangegaan dat hy nie weer met die media sal praat nie.

Die konstitusionele hof het in April 2016 beslis dat die twee partye ʼn konsensus moet bereik en onderhandel hoeveel vergoeding Makate moet ontvang.

Daar is wyd berig dat Vodacom ʼn geraamde R70 miljard deur die diens verdien het en Makate het aanvanklik 15% daarvan (R10,5 miljard) geëis.

Lesufi en ander deelnemers van die beweging het intussen ’n beroep op gewone Suid-Afrikaners gedoen om hul selfoonkontrakte met Vodacom te kanselleer en om geleenthede wat deur Vodacom geborg word, te boikot.

 

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Ella

Wat de hel het lesufie met hierdie geval te doen?

Piet Pompies

Hierdie was ‘n Suid Afrikaanse uitvindsel gemaak deur ‘n lid van die publiek en voorgestel aan Vodacom wat nou nie die nodige erkenning en vergoeding wil verskaf.
Dit is bloot groot besigheid boelie wat dink hulle kan daarmee wegkom. Ons self verminder ons afhandlikheid van Vodacom agv swak diens.

Eddy

Hoekom gaan betoog Panyasa Lesufi nie liewer daar by daai nuwe spogskool wat deur sy eie mense geplunder en gevandaliseer is nie!

JHK

Nou gaan ek eers vir Vodacom begin ondersteun.

At Dippenaar

Nkosana het my steun. Vodacom moet hoes.