Borg onttrek aan Ghoema-musiektoekennings

Steve Hofmeyr ontvang ‘n Ghoema-toekenning (Foto: yjr Photography)

Een van die Ghoema-musiektoekennings se borge het besluit om sy borgskap te onttrek.

Immunadue het Woensdag aan Maroela Media die besluit bekend gemaak.

Schalk Mulder, uitvoerende hoof van Immunadue, het gesê hulle het besluit om hul borgskap by die Ghoemas te onttrek, omdat hulle nie verbind wil word met die huidige gebeure nie.

“Die probleem is daar is reeds so min Afrikaanse platforms wat nog toekennings gee aan Afrikaanse sangers en liedjieskrywers. En nou vind ons uit dat een van die grootstes (die Ghoemas) eintlik net ʼn rolspelery en ʼn politieke armdrukkery raak. So, ons wil nie daarby betrokke wees nie, en ons sal dit nie ondersteun nie.”

Mulder het gesê hy het kommentare op sosiale media gelees oor “Die Land”-musiekvideo se nominasie wat teruggetrek is en agtergekom daar is baie mense wat vra vir ʼn aparte toekenningsgeleentheid waar ander partye en politiek nie ʼn rol speel nie.

“Ek sal ook eerder ʼn aparte toekenningsgeleentheid ondersteun. As daar iemand is wat so ʼn geleentheid op die been wil bring, sal ek weer te vinde wees vir die idee,” het hy gesê.

Immunadue, wat volgens Mulder al sowat vyf jaar ʼn borg van die Ghoemas is, moedig ander borge aan om ook te onttrek.

“Ons is geskok en teleurgesteld. Ek hoop ander borge sal saamstaan. Die organiseerders het al twee maande gelede geweet van die onttrekking, maar dit het eers twee dae voor die Ghoemas aan die lig gekom. As hulle destyds al vir ons gesê het, het ons tóé al onttrek, maar dit voel of hulle ons in ʼn hoek probeer druk het om betrokke te bly deur ons nie daarvan te sê nie,” het Mulder gesê.

“Ons ondersteun Steve en die ander kunstenaars se besluit om nie die aand by te woon nie. Immunadue verbind homself geensins met enige vorm van diskriminasie of uitsluiting in stryd met die Grondwet van die land nie,” het Mulder gesê.

“ʼn Glansgeleentheid soos dié wat die prestasies van Afrikaanse kunstenaars vereer, kan nie vertroebel word deur politieke voorkeure en polities gedrewe besluite nie.”

MultiChoice het versoek dat die musiekvideo van “Die Land”, waarin Hofmeyr saam met ander kunstenaars sing, van die benoemingslys verwyder word omdat Hofmeyr se sienings nie met hul waardes ooreenstem nie.

MultiChoice het gedreig om sy borgskap van die Ghoemas te beëindig indien die nominasie vir “Die Land” vir beste musiekvideo nie onttrek word nie. Heidi Edeling, hoof‑ uitvoerende beampte van die Ghoemas, het gesê daar is toe by wyse van ʼn demokratiese stemproses besluit dat die benoeming onttrek word.

Talle kunstenaars soos Jay, Bobby van Jaarsveld, Bok van Blerk, Dewald Wasserfall en Nicholis Louw het laat hoor dat hulle nie meer die Ghoemas gaan bywoon nie.

Die Ghoema-toekenningsgeleentheid word Woensdagaand in die Sun Arena in Pretoria gehou. Dit sou aanvanklik regstreeks op kykNET uitgesaai word, maar volgens Suzanne Keyter, woordvoerder van die kanaal, is daar reeds vroeër besluit om dit nie te doen nie weens die groot aantal benoemings. Volgens haar hou die besluit geensins verband met die onlangse verwikkelinge nie en is dit reeds vroeër geneem.

Die toekenningsgeleentheid word nou Saterdag 20 April om 20:00 op kykNET, DStv-kanaal 144, uitgesaai. Die blou tapyt word op Sondag 21 April om 18:30 op kykNET NOU!, DStv-kanaal 146, uitgesaai met ʼn heruitsending van die toekennings direk daarna.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

98 Kommentare

jongste oudste gewildste
Annette

Steve bly bo en dankie dat Bokradio saam vir Afrikaans staan!!

Blinkoog Stefaans

Steve jammer vir die moment maar hierdie opsigself is ‘n grootter toekenning as die ghoema vir julle manne.

Geluk!

Marinda

Is dit nie “skelm” om dit 2 maande stil te hou? Nou het hul klaar die borge se geld! Dit laat ‘n sleg smaak in die mond.

Wurmpie

As hul al 2 maande weet. Nie die borge vertel en nou kamstig is die besluit om dit nie regstreeks uittesaai al ń ruk trrug geneem. Kan nou sien hoekom want MultiChoise het al 2 maande terug gesê hul gaan dit niecuitsaai nie

Claude

Dalk het dit tyd geword vir ons om saam te staan en Multichoice te boikot…hou op betaal en begin lees of familietyd deurbring en vergeet van die kassie