Dudu Myeni en Trevor Mathenjwa Vrydag saam in die beskuldigdebank. (Foto: Verskaf)
Dudu Myeni, voormalige voorsitter van die raad van die Suid-Afrikaanse Lugdiens (SAL), en Trevor Mathenjwa, voormalige direkteur van Sondolo IT, is Vrydagoggend in hegtenis geneem op aanklagte van korrupsie en bedrog.
Myeni en Mathenjwa het ’n kort rukkie gelede in die landdroshof in Richardsbaai verskyn waar hulle op borgtog van R10 000 elk vrygelaat is.
Sindisiwe Twala, woordvoerder van die ondersoekdirektoraat van die Nasionale Vervolgingsgesag (NVG), sê die aanklagte teen Myeni en Mathenjwa hou verband met korrupsie van R300 000 by Bosasa.
Twala sê Myeni was gedurende haar ampstermyn as voorsitter van die SAL verplig om haar belange kragtens die SAL se beleid vir botsing van belange bekend te maak, maar het na bewering versuim om dit te doen.
Myeni word nou van korrupsie aangekla nadat sy na bewering geld ontvang het van Sondolo IT, ’n filiaal van Bosasa. Mathenjwa het na bewering hierdie fondse vir Myeni aangebied.
Myeni word daarvan beskuldig dat sy van Mei 2014 tot Maart 2015 met die geld sekuriteitsopgraderings van R200 000 aan haar eiendom in Richardsbaai gedoen het.
Sy word ook daarvan beskuldig dat sy en mense na aan haar danksy Bosasa in hierdie tyd by meer as R107 000 se hotelverblyf en reiskoste gebaat het. Die reise is volgens die OD deur Blake Travels gefasiliteer.
Myeni en Mathenjwa moet weer in November in die hof verskyn.
Myeni is ʼn noue bondgenoot van oudpres. Jacob Zuma en is in Mei 2020 tot misdadige direkteur verklaar. Sy word daarvan beskuldig dat sy bygedra het om die SAL op sy knieë te dwing en die Zondo-kommissie na staatskaping het aanbeveel dat sy vir moontlike vervolging verwys word.
Siestog, kry die goed amper jammer met die koppe wat so neerbuig.
Is die ‘n joke? Daar is baie groter sake waarvan sy aangekla kan word. Die 300k gaan haar net ‘n klap op die hand gee.
Nou is hulle weg soos laas maand se pay.
Altyd Kop onderstebo….. dis wat gebeur is jy weet jou tyd het gekom.
So vang slim toe sy baas…
Lekker. Gaan net liggies op die vingers geraps word en is seker klaar n kabinetspos aangebied vir volgende jaar
Hierdie saak behoort nie langer as so tien jaar te duur nie.
Die “medêm” moes al laaaankal in die tronk gewees het. Stoere Zumaliet.
R10 000 borg is soos R5 vir die man op straat. Mies ten minste R1 miljoen wees