Brand by parlement dalk terreur

‘n Klag van terreur staar Zandile Christmas Mafe (49) nou ook in die gesig. Hy word daarvan beskuldig dat hy die brand by die parlement gestig het. (Foto: Gianluigi Guercia/AFP)

Die man wat daarvan beskuldig word dat hy die verwoestende brand by die parlementêre kompleks in Kaapstad gestig het, word nou ook van terrorisme aangekla. Aanklagte van roof en brandstigting staar hom reeds in die gesig.

Zandile Christmas Mafe (49) het Dinsdag vir die tweede keer in die hof verskyn nadat hy op 2 Januarie, kort nadat die brand wat groot dele van die kompleks in puin gelaat het, in hegtenis geneem is. Hy het drie dae later vir die eerste keer op die aanklagte teen hom in die hof verskyn.

Mafe is aanvanklik daarvan aangekla dat hy by die parlement ingebreek het, sowel as van brandstigting en die bedoeling om te steel – onder andere skootrekenaars, breekware en dokumente – voor die nuwe terreuraanklagte Dinsdag bygevoeg is.

Volgens die nuwe klagstaat is die beskuldigde “skuldig aan die oortreding van bepalings van … die beskerming van die konstitusionele demokrasie teen terreur en ander verwante bedrywighede”.

Eric Ntabazalila, woordvoerder van die Nasionale Vervolgingsgesag (NVG), het buite die hof gesê die staat het ʼn sesde aanklag bygevoeg – dat die beskuldigde ʼn toestel in die parlement laat ontplof het.

Die brand het kort voor sonop op 2 Januarie uitgebreek en na die vleuel wat die Nasionale Vergadering huisves, versprei. Dié saal is heeltemal verwoes nadat die dak onder meer ineengestort het.

Buite die hof het betogers saamgedrom en Mafe se vrylating geëis. Hulle voer aan daar word van hom ʼn sondebok gemaak.

Dali Mpofu, Mafe se regsverteenwoordiger, sê sy kliënt is verlede week vir sielkundige waarneming gestuur en paranoïese skisofrenie is by hom gediagnoseer.

‘n Groep betogers buite die Kaapstadse landdroshof eis Mafe se vrylating. (Foto: Gianluigi Guercia/AFP)

Mpofu is een van Suid-Afrika se bekendste advokate en het al hoëprofielfigure soos oudpres. Jacob Zuma verteenwoordig. Hy vra die hof nou om Mafe op borgtog vry te laat.

In teenstelling met sy eerste hofverskyning, toe hy bebaard en in ʼn grys hemp en knielengte denimbroek in die hof verskyn het, was Mafe vandag skoongeskeer en geklee in ʼn ligblou hemp en donker baadjie.

Daar het sedert sy inhegtenisneming ʼn debat ontstaan oor of Mafe, wat in sommige mediaberigte as haweloos beskryf word, werklik verantwoordelik was daarvoor om die gebou aan die brand te steek.

ʼn Groep van sowat 30 mense het buite die Kaapstadse landdroshof betoog en geëis dat Mafe vrygelaat word. Hulle het plakkate rondgeswaai met die woorde “Free Mafe”, “He is innocent” en “He is not guilty”.

Dali Mpofu, een van die land se bekendste advokate, is Mafe se regsverteenwoordiger. (Foto: Gianluigi Guercia/AFP)

Een hawelose man onthou die gebeure op die aand toe die brand ontstaan het. Volgens hom het hy op ʼn straat naby die parlementêre kompleks geslaap en ʼn geluid gehoor wat soos ʼn motorbotsing geklink het. Hy het later begin vermoed dit was die slag waartydens by die kompleks ingebreek is kort voor die brand uitgebreek het.

ʼn Voorlopige verslag deur die Stad Kaapstad het verlede week gewys die brandopsporingstelsel het “foutief” gelyk en dat “sproeiers nie geaktiveer is nie”. Dit is boonop in 2017 laas gediens.

Dit het tientalle brandbestryders langer as twee dae geneem om die brand in bedwang te bring.

Geen beserings is aangemeld nie, maar die omvattende skade het die land geskok en die owerhede onder andere gedwing om die jaarlikse staatsrede deur die president na ʼn alternatiewe lokaal te verskuif.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

40 Kommentare

jongste oudste gewildste
Tubac

Dalk terreur! Pleinweg vandalisme. Mpofu sy regsverteenwoordiger. Slang in die gras. Wonder wie wil nou dinge onder die mat invee.

casper

Sjoe ne !!
Nou gaan hulle nog die perd as mal verklaar en kan hom dan nie formeel aankla nie —
Dis ‘n klug want hulle het iets om toe te smeer !!!

Shakespeare

Dalk vertaal in ANC/EFF taal…..gladnie, Want dit kom vd top bestuur af.

JM

Dali Mpofu verdedig graag ‘muishonde’ van die samelewing. Skree ook graag in die hof vir ander partye om te “shut up!”

koos

“sê sy kliënt is verlede week vir sielkundige waarneming gestuur en paranoïese skisofrenie is by hom gediagnoseer.”
Die man is nie ‘n krimineel nie, hy is regeringsmateriaal. Kan selfs nog as president verkies word, wie weet?